財爺大幅增加五成煙草稅，一班煙民、報販、娛樂場所經營者噚日喺社民連號召下，成千人操上政府總部抗議。唔少示威者即場公民抗命，公然喺列為禁煙區嘅政府總部中座空地度齊齊煲煙。政府保安員眼見群情洶湧，都唔敢輕舉妄動，再次發揮特區政府欺善怕惡嘅本色，隻眼開隻眼閉。
唔少示威者都話本身唔反對禁煙，今次企出嚟主要係不滿官員斷章取義，冇顧及低下階層生活，皆因煙稅咁加法，對有錢人冇乜影響，但小市民就真係捉襟見肘。另一方面嗜飲紅酒嘅唐唐做財爺嗰陣就免紅酒稅，令示威者覺得呢個政府只許高官飲平酒，強迫窮人食貴煙。
保安話個場俾煙民包咗
遊行人士上到政府總部之後，有人煙癮大發，亦都有人擺明唔妥政府，陸續拎出打火機點煙，吸多幾啖帶有尼古丁嘅自由空氣，成個政府總部中座對出空地頓時間煙霧迷漫，二手煙雲密佈。一早戒咗煙嘅社民連立法會議員黃毓民，眼見勢色唔對，即場呼籲煙民合作，唔好喺呢個非吸煙區度點煙。
不過，煙民點起支煙，就點㩒都㩒唔熄。有自稱係夜總會常客嘅煙民，更加走上集會前台，喺個煙包度，大手筆咁拎咗三支煙出嚟點着佢，話要送畀曾俊華喎。唔知鬍鬚曾知道，會話「大吉利是」定係偷笑，多謝佢增加庫房收入呢?
八方翻查資料，行政署06年宣佈過政府總部有兩個吸煙區，分別係西座7樓牙科診所對開行人路，同東座往炮台里嘅一塊小空地。換言之，煙民噚日煲煙嘅中座對出空地係禁煙區。現場咁多人擺明違規犯法，政府總部嘅保安人員，又好奇怪地冇出面干預，亦冇報警或打畀衞生署控煙辦拉人。
八方覺得呢種執法態度好奇怪，點知保安公司嘅負責人話場地批咗畀遊行人士，所以唔會阻佢哋喺政府總部範圍內吸煙。行政署發言人噚晚亦向八方解釋話，因為已經批咗做公眾集會，嗰度變咗做公眾地方，冇法理依據禁人食煙，加上食煙係個人行為，唔係非法，為免發生不愉快事件，激化遊行人士嘅情緒，冇強烈要求佢哋唔好食煙，但都即時同毓民溝通，透過佢去勸喻。
咁講法，下次申請到去政府總部示威嘅團體喺裏面燒嘢食、打邊爐都得啦？八方就唔信班保安員會唔理。睇怕問題關鍵係示威者人數眾多，政府欺善怕惡，當時運高乜都睇唔到啫。
mailto:[email protected]