做人最緊要公私分明，社民連喺立法會掃場，主席曾鈺成執行家法趕佢哋走，但行出立法會，雙方又可以同枱食飯。社民連三子早排出席鈺成飯局，據講席間曾鈺成搞爛gag，搞到社民連未食飯已經笑餐飽。
阿曾同社民連講，早前到西環見街坊，忽然有個人好熱情行埋佢身邊，大聲叫佢，但就嗌「曾健成」，即係社民連阿牛，搞到佢啼笑皆非，估計係因為社民連近日知名度暴升，市民張冠李戴嗌錯人。
獲阿曾曲線擦鞋，有在場人士指毓民當場笑到收唔到聲。聽聞舊年阿牛出選港島時，的確幻想過會唔會有選民混淆咗曾鈺成同曾健成，誤將鐵票投畀佢，估唔到咁騎呢嘅事都唔係冇可能發生。早前曾鈺成請民主黨食飯，張文光食埋甜品搞到肚屙，社民連呢餐早有準備，講明唔食甜品。