Esprit興發街88號潮人重鎮
Esprit喺九十年代有幾紅？連軟硬天師都有句歌詞「永遠懷念興發街嗰間Esprit」可見一斑。Esprit由DougTompkins夫婦創立，八十年代時由邢李㷧帶到香港，去年剛滿40歲，當年吸引潮人全因着重設計一種流行文化，由頭到腳以至浴室家品皆有，是一個Lifestyle品牌。Esprit更於九十年代初期成立地球日，讓世界各地員工於同日為環保工作（如植樹或清潔海灘等）超過4,000小時，行得比今天的大企業快幾步！
Winifred（資深時裝人）
「喺八十尾、九十年代時好鍾意行Esprit，佢犀利在每三日落一次新貨，當時係無時裝店可以做到呢樣嘢，所以每次去睇都會有新貨，好新鮮。我做緊學生嗰時都成日去興發街88號，到九十年代就去彌敦道間大舖，嗰時有好多FashionItems，雖然係MassProduction，但因為太多款式的關係好少話會撞衫。Esprit係環保先鋒，第一個率先講Eco-Friendly，好有團體精神，個個Sales都整潔醒神，令你幫襯得好開心。佢哋仲係第一個做會員折扣卡，我83年時揹個Esprit袋已經係好犀利，當時唔係人人都有！」
G-Shock一隻膠錶炒過萬
G-Shock和Baby-G同屬Casio出品，雖然係膠錶一隻，但喺九十年代絕對潮爆。第一隻G-Shock誕生於1983年，當中以Frogman款式最盛行，時至今日都仲可以炒到成萬蚊，而Frogman當中嘅Brazilian、MeninYellow同BlackSpots等都係G-Shock收藏者最愛。到咗九十年代，G-Shock個妹Baby-G開始喺女生界興起，因為顏色多又Girlie，讀書時真係大半班同學都擁有。據信和In-Watch老闆所講，九十年代係G嘅全盛期，「嗰時日賣最少幾十隻，就連日本仔都嚟幫襯，仲要拉閘畀佢揀，一掃幾十隻，有啲阿媽仲瘋狂到六千幾蚊隻錶都買畀個仔戴返學。嗰時啲人咩色都啱，有啲款仲炒到過萬，你諗吓一隻膠錶炒過萬真係好犀利！」
Wallace（I.T創作總監）
「眾多錶中，G-Shock我儲得最多，九十年代頭我開始鍾意美國滑板街頭潮流文化，所以成日都會板仔打扮，會戴DW-6900G-Shock嚟襯，之後就開始買特別版如Stussy25周年等G-Shock。DW-6900款梁朝偉喺《春光乍洩》同奇洛李維斯喺《生死時速》都有戴過，Fingercroxx早排同G-Shock合作出咗隻DW-6900。」
Kary（歌手）
「我第一隻G-Shock係好大嚿黑色嗰隻，因為細個比較男仔頭。之後到小學尾開始見到同學仔有Baby-G，覺得幾靚就叫媽咪買，記得隻錶又有燈又多顏色揀，總之當時嚟講覺得好新奇。」
Juno（歌手）
「一向都鍾意大錶面，所以好鍾意G-ShockFrogman，年幾前仲喺網上Bid過一隻《24》限量版Frogman。」
Dr.Martens代表着一個時代
Dr.Martens於六十年代面世，七十年代象徵Punk文化，八十年代開始普及化，到九十年代更成為殿堂級經典。香港最先引入的就是現時I.T老闆沈嘉偉，並由此掘得第一桶金。DM擁護者層面甚廣，包括Artists、Band友、Fashion友和學生等。九十年代最經典的返學鞋款必定是3孔鞋款和女裝TBar鞋款，有「返學鞋王」之稱。而皮靴就以10-Eyelet最好賣，其中百搭黑色最受歡迎，潮星中有王菲同鄭秀文等力撐。
鄧達智（時裝設計師）
「高峯期嘅時候我有38對Dr.Martens！九十年代時真係好Hit，我諗由10到50歲嘅人都會着佢。記得嗰時同姪仔一齊買一齊着，雖然大家唔同Generation但都有共鳴。DM好有影響力，仲要係Internationally，直情係代表住一個時代。」
MandarinaDuck那是一個美好回憶
MandarinaDuck（MD）在1977年創立，以顏色行先，在八十尾、九十年代開始大熱，當時中環置地廣場地庫專門店就最多捧場客。用過MD都會記得IconicSistema彈弓透明膠手挽款式，好多學生買嚟當書包用；之後最多人擁有嘅就係MD20背囊同小物袋，質地輕身顏色仲有幻變Feel。半年前MD在港先後重開兩分店，由JoyceMa之女掌舵，好多舊款已經絕版，在店內再搵唔番。
NingLau（Joyce市場傳訊總監）
「我都曾經有兩個MD，第一個係黑色Sistema，當時個個同學都揹Bold袋，我反而鍾意Subtle，所以就買黑色MD，覺得幾有型。之後當MD20出嗰時又買咗個當時好興嘅棗紅色背囊。我覺得時裝只係一啲潮流，家陣MD無九十年代咁Hit，但將來都可能會興番，等大家都可以再諗番起以前嘅好回憶。」
BOYLondon曾與哥哥上舞台
提起BOYLondon一定要提BoyGeorge，於CultureClub年代成日FullGear上陣，直情係品牌代言人！講到BOYLondon最興Items，第一係Badge，當年好多潮人都鍾意將Badge車落條Levi's501度；第二係好大個BOY字嘅牛仔褲；之後就有Trucker帽、短身尼龍Jacket等；至於手錶就直到九十年代後期先興起。據前潮舖PeopleArePeople老闆ParisChan講番：「當年識着BOY嘅人已經好有Taste，啲貨成日都賣斷，連哥哥張國榮都係BOY嘅擁躉。記得佢喺香港第一次搞告別演唱會之前嚟買咗條金色BOY字貼身短褲，仲喺演唱會度着；另外李麗蕊同黃耀明都係Fans。」
NelNel（明星Stylist）
「九十年代初我都有買BOY嘅飾物例如Badge同帽，之後都有買過腕錶。我覺得BOY好有自己Style，嗰時佢哋好潮，做啲嘢完全唔同大路品牌，以前鍾意蒲D嘅人同潮人必買。」
LeSportsac最愛藍色降落傘
LeSportsac於1974年成立，係第一個用降落傘尼龍料設計袋嘅品牌，出名質料輕身又易洗，可摺起收藏，最啱旅行時攜帶，更曾與各大時裝牌如StellaMcCartney、JonathanAdler、DianevonFurstenberg及GwenStefani等合作。九十年代中期為全盛期，當時好多學生哥和上班族都總有一、兩個，首選更係寶藍色。今年係LeSportsac35周年，特別推出淨色復刻版，以黑、白和綠色為主題。
鄧達智
「LeSportsac我家都仲用緊，因為我無耐性去等行李，所以十次有九次都係HandCarry。我覺得LeSportsac好耐用，事關通常任何袋太薄都係唔襟，但係佢就好襟用，我去旅行都會買吓嘢，所以摺多一個放入行李就最好。最近發覺佢哋喺Design方面好進取，有款式之餘又保持耐用性。」
