一向認叻的賭王何鴻燊昨日入沙田馬場捧愛駒，雖然事前不抱希望，但最終馬匹三甲不入，他惟有轉黐親戚拉頭馬，認真失威。談到有藝人涉吸毒，賭王即表明要子女遠離毒品。
沙田馬場昨日舉行一年一度的香港打吡大賽，吸引了大批名人馬主入場，賭王何鴻燊與三房長女何超雲、其過氣親家許世勳夫婦及許晉亨、胡應湘、鄺美雲、譚詠麟、陳慧琳（Kelly）爸爸和胡家驊與吳婉芳夫婦等，任宣傳大使的劉璇則倒米說自己不會賭馬及投注，但她說：「我發現體操和賽馬有共同之處，就是要長時間訓練，才能做到人馬合一。」
志在參與一早認輸
賭王專程入場捧愛駒「爆炸」，一向認叻的他，賽前卻少有認低威說：「冇乜機會，有第3已經好，打吡日志在參與吓，睇吓贏到第幾囉。」賭王在會員看台上，發現愛駒表現麻麻，睇到木無表情，更拇指向下表示愛駒跑得「水皮」，最後「爆炸」三甲不入。冇馬贏，賭王惟有轉黐姪女藍潔嫻的團體馬「閒話一句」，總算拉到頭馬，沒白行。
在外國讀書的何超雲，透露放復活節假回港陪爹哋，問賭王年輕藝人涉及吸毒事件，他說：「吸毒呢啲嘢我就最憎，教晒啲仔女，最好避之則吉。」賭王過氣親家許世勳一樣輸馬，許家兩老同許晉亨一齊，仍然不見李嘉欣，追問許晉亨到底李嘉欣是否有喜？為何不入場？他一律只微笑不答。
陳爸爸讚Kelly好嘢
同樣現身馬場的陳慧琳父親陳崇偉則幸運得多，Kelly婚後火速造人成功，記者恭喜他即將榮升公公，更是男孫，他即開心回應：「係呀，好，一索得男，好嘢，要孫有孫，幾好彩。」提到Kelly仍然穿高跟鞋，陳爸爸即詫異說：「唔係呀？」他指Kelly暫時不用補身，但有請陪月做產後調理。
採訪：JessicaNgan
攝影：DickyChan