敏妮近期俾人問到一個保險問題。話說有個公務員朋友，入息高，前幾年離咗婚，個女跟媽媽，佢前妻只係象徵式攞1蚊贍養費，但要佢負責供養個女。對於呢位公務員嚟講，負擔唔算重，直至近呢一年，個女計劃留學，要孭起晒啲費用。一下子負擔重咗，佢就諗將之前買落嘅「巨額」保單，保額減啲，縮少保費支出。
轉買定期壽險
佢走去問做財務策劃嘅朋友，佢朋友建議直情cut單，轉買定期壽險，就可以慳啲保費，原因係個女讀完4年大學就可以出嚟做嘢，自己照顧自己，公務員朋友又同老婆離咗婚，唔使再諗一旦自己死咗，老婆會冇依靠，加上佢自己退休後又有政府長俸，換言之，最大用錢需要就係阿女留學呢幾年，所以cut咗張壽險保單，用保單嘅現金價值，轉買一份5年定期壽險，已經好夠用，又慳到保費。
另一個財務策劃師朋友有第二個建議，就係保留家陣份壽險，用滾存紅利嚟交保費，優點係keep到張保單，又唔使畀保費。缺點係用咗啲紅利供保險，日後可以攞番嘅現金價值自然少咗。
公務員朋友問邊個建議可取？敏妮一向建議人唔一定要考慮傳統壽險，同樣保額，定期壽險保費平啲，適合短期錢銀唔係咁鬆動嘅人士。而且，敏妮唔贊成留低大筆財富畀下一代，以公務員嘅情況，佢冇父母同太太要照顧，頂多係一個女，做父母嘅供書教學，提供求生技能畀佢就夠，冇必要留低大筆錢，定期壽險可能比較適合。
用紅利交保費
不過，由於佢張保單已經供咗一段時間，如果紅利夠支付保費，就可以解決短期用錢需要，咁可能保留舊單較化算，始終買過張定期壽險單，可能要以現時嘅身體情況嚟評估保費，有唔明朗因素。
溫敏妮
http://wanmanli.com/blogs/