各部門不論大小,都響應煲呔呼籲創造就業機會,廉政公署都唔例外,最近登報請助理廉政主任(技術員),月薪約14,000蚊。
呢個職位有非一般嘅入職要求,除咗具備一般中、英文學歷,仲要識畫圖則,又要曉得手造特製傢俬、製造木工製品、操作木工機器同安裝木器,連五金製品都要有深入認識,仲要喺戶外同高空工作。八方以為廉政主任只係負責調查貪污案件,何解要落手落腳做埋木匠?
知情人士話,呢個職位確係要做木匠,因為廉署行動有時需特製嘅器材裝置,基於機密原因不能假手外判,而且廉署總部入面亦有啲木工維修要做,好似盤問房張特製三角枱咁,廉署入面唔少機密嘢,如果搵外人做都要派同事實,所以一向都有請其實係做木工嘅助理廉政主任。