無綫《勁歌金曲》自從改作現場演唱後，頓變歌手試場，入行7年的傅穎（Theresa）前晚登上節目即時露了底，兩分鐘不足唱十多句歌詞，大部份走音兼脷，令人聽得驚心動魄，更被網友視為「屎」上最強歌手。
傅穎近日頻頻亮相大小場合宣傳新碟，但經常失準兼落淚收場。她前晚亮相無綫的《勁歌金曲》獻唱新歌《花吃了這女孩》，雖然只是短短不足兩分鐘的演出，但其唱功卻不敢恭維，在十多句歌詞中連環走音兼唱到脷，令人慘不忍睹，站在台上時更棟篤企，拘謹得有如參加音樂比賽的新丁。
自稱滿意表現
事後Theresa直認心情緊張，唱罷才能鬆一口氣，她一副過關樣子說：「我覺得自己好似釋懷咗，好感動呀，有好多朋友前輩都嚟支持我，又send短訊鼓勵我，我對自己表現都滿意，真係踏出一大步，以前我好少上《勁歌》，其實之前我都擔心過會有啲預計唔到嘅事，好在冇乜意外。」對於有指她早前錄影一個無綫音樂節目《360°音樂無邊》，因為表現差而被導演破口大罵，她否認說：「導演冇鬧過我，佢好支持我，好錫我。」
雖然Theresa口口聲聲跨過難關，但網友卻未有放過她，更把她與唱《電燈膽》成走音王的鄧麗欣（Stephy）相提並論。網友狠批Theresa走音神功比Stephy有過之而無不及，更稱兩位自02年拍檔Cookies出道的歌手「五音不全，差過新人」。有網友更直指Theresa是「香港『屎』上最強歌手」，勸她收山或轉行做model好過。
支持掩蓋腐敗
Theresa昨日更新網誌時似仍未知自己走音嚇親人，更感謝《勁歌》台前幕後、古巨基及fans支持，又多謝好友給她數之不盡的正能量，傅穎在網誌中說：「這力量大得把一切腐敗都掩蓋，這個心理關口衝過去了……我回來了，而且決定了要帶着微笑。」
採訪：楊潔雯、丁寧
攝影：仇志德
