雖然距離7.1仲有三個幾月，身為「香港良心」嘅陳太噚日出席公開活動時，就已經講明會參加今年嘅7.1遊行，因為佢好關注政府近來經常「聽而不聞、視而不見」，削弱一國兩制之餘，亦冇盡力維護港人嘅人權自由。陳太仲呼籲，港人如果對政府有乜不滿，希望民主步伐快啲，都應該行出嚟，令政府聽清楚香港人有乜諗法。
參加遊行表達政見
陳太話，唔少學生問佢可以點參與政治，佢認為其中一個渠道，就係對政府管治表達意見，「其中一個好方式，就係參加7.1遊行」。
同場嘅鄭經翰繼續抱怨佢個電台起發射站單嘢搞咗好耐都未搞掂。一向被指係「煲呔針」嘅佢話，如果煲呔搞親疏有別，「我相信係疏嗰個」，話最快要12月先開台，仲諗緊搵馬時亨、葉澍堃開咪。
對於近期熱話嘅任總退休事件，大班話陳德霖夠經驗做繼任人，但都應該公開招聘。至於陳德霖家特首辦主任個位，大班認為林D9係好人選，因為呢個位最緊要煲呔信得過同忠心；八方心諗，大班呢個建議如果真係獲得採納，唔知會唔會谷高7.1上街人數。