港產片、內地化！不嬲都好正常，正如吳宇森導演齣《赤壁》，偉仔亦要講國語迎合內地觀眾口味，絕對大勢所趨！不過最新返到嘅馮小剛電影《非誠勿擾》，雖然100%純國產，但係DVD內卻特別加插廣東話配音，嚟滿足香港人需要。講真，香港已經回歸祖國十幾年，仲未習慣聽普通話，真係要鞭番兩嘢！
記者：陳國輝
粵語配音難生動
當你睇開馮大導搭葛優嘅電影應該Feel到，佢戲內說話時聲線高低特別明顯，加上葛優嘅說話速度好有Character，每句得幾粒字咁短，就算經常幫無綫卡通片配音嘅專業配音演員，要做到聲人合一，睇怕極有難度！
不過點都要讚吓呢個廣東話版本，雖然同國語版仲有段距離，但勝在並非一味搬字過紙，見字照讀嗰隻！特別係對白中滲入些少香港俚語，我哋班觀眾固然睇得舒服啲，但呢齣戲裏面其實有部份本港演員，例如方中信，配音後佢把聲唔同晒，感覺有啲似舊時啲港產片，係咪都搵人配音咁搞笑！
王老五網上提親
華僑實業家秦奮（葛優）由美國返到北京，一心諗住探吓母親，點知喺CoffeeShop上網嗰陣突然萌生起結婚念頭，仲即時撰寫一篇以「非誠勿擾」作結嘅徵婚啓事，隨即吸引眾多騎呢女子前來約會。後來佢邂逅到一位靚女空姐笑笑（舒淇），雖然襄王有夢，可惜神女無心，二人反變成一對歡喜寃家，有次去北海道旅遊，笑笑終於表明來意。
餐廳暗位雜訊多
另外要讚吓今次電影取景，全部風景秀麗，而且充滿大自然嘅感覺。首先去杭州西湖撐船仔，跟住又戀戰北海道，更正係走到入小鎮內嘅神社、居酒屋同埋教堂內拍攝，每一場景各有HeartFeeling，淨係視覺衝擊已大飽眼福！唯一可惜係呢套電影只推出VCD、DVD兩個版本，未能以高清效果嚟顯示北海道嘅靚景；反而，某部份場景例如約會餐廳裏面、居酒屋或晚上環境，雜訊都幾厲害，如果出埋Blu-ray相信效果會理想得多。
馮導借分歧終端機搞Gag
每一齣馮小剛電影都好多笑位，而呢次應該係葛優約會女子相睇嗰幾幕，例如佢會遇上性冷感靚女、超級吹水女Sales、鹹濕基佬同埋異地少數民族，淨係睇佢點樣同呢班女士溝通已經夠過癮；另外，馮大導仲專登借咗《AV》戲內用過嘅「分歧終端機」，喺開場同結局嗰陣搞吓Gag。究竟點玩法？大家買番隻DVD睇吓咪知囉！
名稱：《非誠勿擾》
種類：愛情喜劇
片長：125分鐘
聲道：DolbyDigital5.1、dts5.1
語言：粵語、國語
收錄：預告、製作特輯
