遠東發展（035）啱啱創咗5年低位冇耐，未計重估前折讓，已經吸引到痹，價殘兜一轉。遠展喺呢個月頭，創出5年低位0.63元，現價都係講緊0.8元，相對每股NAV2.98元，折讓已經達到73%，酒店股當中，呢個折讓好吸引。又遠展因為金融海嘯，已經暫時擱置分拆酒店資產大計，但擱置還擱置，事實係，呢批酒店資產未做過重估。好保守計數，連酒店資產重估，遠展NAV上到3.80元，實際NAV折讓高達79%。
再講，遠展最新手頭現金16.5億銀，勁多銀彈，金融海嘯期又正好為集團提供執筍貨嘅機會。事實上，上年年尾，遠展曾經話，考慮若干收購，兼可能配發新股。又要咁睇，遠展啱啱先創出5年低位冇耐，若果真係有新動作，集團又會唔會割愛，用海嘯價嚟集資？趁遠展價殘，先兜一轉，仲要係咁意以重估後折讓70%做目標，遠展都講緊要升42%到1.14元。
錦興折讓94%超抵買
錦興（275）繼上年年尾50合1，呢期又啱啱完成咗1供3嘅集資，現價講緊得0.36元，仲殘過03年沙士最低位0.608元，亦只係高過呢期供股價0.35元1個斗零咁大把。連埋供股攤薄效應，錦興最新NAV講緊高達6蚊，現價折讓高達94%。就算再將NAV打五折，錦興嘅折讓，仍然高達88%，邊有殘得咁緊要？錦興價殘，酌量收集，擺埋一邊，就算現價翻一番到0.72元，以後邊打咗五折嘅NAV3蚊嚟計數，折讓仲係高達76%，依然係殘到痹。
錢雋