社民連毓民噚日喺石硤尾邨開首個議員地區辦事處，佢話明落區要特別服務長者，唔止要收o靚，耆英都係重點拉票對象，老嫩通殺。
毓民喺立法會上出蕉，迫使煲呔取消生果金入息審查建議，獲得唔少長者掌聲，毓民噚日主持剪綵儀式時，喺台上大嗌：「我哋掟完（蕉）後，即刻免入息審查，啱唔啱呀？」台下過百公公婆婆即時歡呼喝采，又大叫煲呔食蕉，當正毓民係英雄咁。毓民透露已成立一個「長者之友」衞星組織，振臂一呼已有逾300人加入，隨時係後生仔之外，支持社民連中堅分子。
噚日有個重量級長者做嘉賓，就係現年78歲嘅華叔。華叔訓話，指社民連同民主黨、公民黨早排因為「掟蕉」、「掃場」等事意見分歧純屬小事，係民主社會嘅正常表現，最重要係處理政改大事時團結一致。程翔、林旭華、蕭若元等都有到場撐毓民，大班人唔到花籃到，總算一場朋友。