行蠱惑有「天文台」負責睇水，漁護署則有個山火瞭望台負責睇火，八方日前去到粉嶺鶴藪山火瞭望台，發現睇火原來仲有個特別任務！
暸望台有張通告，指明見到特首或司局長駕到，就要盡快通知山火控制中心，報告人數、時間同行程，仲要落簿記錄在案。至於點解要咁做，有關方面都唔多清楚，估計同保安理由有關，亦有人指殖民地時代港督鍾意行山，隨時出巡，所以漁護署比較緊張。
八方好奇，揭開本簿睇睇，紀錄咗04年4月4日星期日，前局長冬冬同兩個後生仔途經瞭望台，局長問當值人員點樣行去流水響，又問假期多唔多人行呢條路。紀錄似乎好詳盡，可惜有關人員百密一疏，話冬冬係食物環境衞生局局長，應該係環境運輸及工務局局長先至啱。