呢日入馬場，前面有一架黑色七人車，大家慢慢駛入停車場，左丁山睇到黑色七人車嘅車牌係CAGA，一時不明其所以，呢個車牌有何特別之處？後來先至醒起，影藝紅人曾志偉有兩匹馬，一隻係「卡加小子」，一隻係「卡加大師」，咁樣推論，此黑色七人車嘅車主就會係曾志偉。
後來到咗投注時刻，在左丁山前面排隊落飛嗰位就係曾志偉啦，佢與左丁山一樣，係標準馬迷，逢賽馬，必在場，輸死無怨，不過最近頻頻見到曾志偉、譚詠麟、元彪、鄺美雲等人拉頭馬，相信佢哋班人贏到開巷，好過開騷！
講起做騷，陳志雲叫左丁山去睇佢嘅舞台真人騷「志雲飯局」。呢個電視台節目，因屋企冇高清無綫收費台，自己從來冇睇過，喺報紙娛樂版（甚至《蘋果》頭版）就見得多，呢類節目點會搬上舞台嘅呢？怕唔怕悶親觀眾呀？陳志雲大師話冇有怕，仲要去文化中心音樂廳表演，認真藝高人膽大。呢類舞台真人騷，冇遮冇掩，要吸引全場觀眾坐足兩小時以上，要有好多噱頭先至得。
志雲大師話全靠老友幫忙，四月二十七日搵到謝安琪、謝偉俊、陳百祥、葛民輝；四月二十八日有側田、汪明荃、曾志偉、王維基四人做現場訪問；四月二十九日搵到陳潔靈、陳淑莊、鄭裕玲、吳君如，每晚除咗逐位訪問之外，仲有一個五人齊做「城市論壇」環節，現場觀眾可以做維園阿伯真人版，即場發問，請每晚嘉賓即時回答。至於技術上如何安排，志雲大師話：「你買飛入場之後就會知道，家唔講畀你聽。」
玩懸疑咩，啲招數左丁山略識一二，不過費事在此篤爆。志雲說：「不如你問定一啲朋友喜歡我問邊啲問題？」咦好玩噃，於是問秘書Ｖ：「假如你去睇『志雲飯局』舞台版，見到呢班人，你想問乜嘢，我代你向陳志雲轉達！」秘書Ｖ聽見話陳志雲，已經暈暈地，可惜志雲唔會為靚女而暈嘅呢。秘書Ｖ話要諮詢一班姊妹先，打完一輪電話之後，佢走嚟匯報：「調查所得，大家想問陳百祥點解會畀人騙走幾千萬，問王維基收咗亞視幾多錢，叫謝偉俊穿泳衣登台，問陳淑莊如何看待忘年戀，問鄭裕玲點解要撇呂方……」夠嘞夠嘞，轉告陳志雲先。