20年前，林嘉華為了剛出生的獨生子林政峰，一早決定移民加拿大，目的就是令兒子有個美好的生活環境。好多人說他竟然捨得放棄演藝事業，但其實嘉華哥一直有演戲，只不過對象是自己的兒子，而且他說這場做足20年的戲，分了三個不同的場口，時間雖長，卻比以往任何一套電視或電影做得還要真心……
記者：林佩婷
攝影：伍慶泉
場地：帝苑酒店LeSoleil（27332033）
第一場
仔仔出世變奸人堅
嘉華哥話做父親應該有唔同階段，就好像每套戲應有不同性格。「以前中國社會，一家之主觀念好重，一言堂父親係Work，但用喺家個社會就唔得，孩子唔同年紀就相應有唔同角色，可以話要真心做呢套永不完結長篇劇。BB初出世，就同太太諗住一個做奸人堅、一個做黃飛鴻。最初我梗係想做忠，點知搞搞吓俾太太攝咗位！」
第二場
6-12歲學變臉
孩童的成長過程如樹苗，嘉華哥形容「唔扶住行遇到風雨時就會偏差」。所以當兒子牙牙學語時，「我嘅角色就好似牧羊人放羊咁，呢個時期要教曉佢做人基本要求，仲由我話晒事。」到政峰6歲開始，嘉華哥就話唔可以一味SayNo，要學變臉。「呢個時候一味話唔得係唔可行，要令佢知乜嘢係得同唔得，要好似釣魚咁時緊時鬆，亦唔係話佢要乜就畀，而係有獎有罰，好似我哋每個星期都會去玩具店，觀察佢最鍾意乜，我就利用聖誕節送禮物，話聖誕老人有本記錄簿，獎罰分明，到聖誕節佢就會掛隻襪喺度，試過12歲嗰年，因為佢唔夠乖就無禮物，真正俾佢知道咩叫賞罰分明。呢個階段要Keep住童真世界，唔好俾家庭煩惱影響，等佢做個HappyChild。」
第三場
13-18歲扮惡爹哋
在北美社會，青年人較早熟，政峰亦有同樣問題。「同朋友一齊佢會有比較，會問點解人得佢唔得，呢個時候好易做出同年齡不符嘅行為，我就要演比較嚴嘅角色，太太就做第三者去舒緩。因為呢場父子之戰一定要贏，而且百戰百勝，否則以後好難教。過咗17歲，開始轉為朋友關係，關注心靈思想多過行為，唔再一味限制佢。」
離開玻璃屋
不過他認為到仔仔大個就要幫手分憂，不能長住玻璃屋內。「我同朋友聚會，佢會坐喺度接觸成人社會。家唔會忌諱俾佢知現實社會係點，我要佢建立交際網絡，高中就要佢財政獨立。當然人大了負的責任會越來越多，但我唔會迫佢，等佢將來遇到挫折，自然就識改。好彩細個陪佢大，令佢份人開朗樂觀，兩父子又傾到偈，將來遇到問題都唔會太擔心。」難怪他無悔當年放棄演藝事業，「計劃有BB時，已同太太講要移民，覺得無論環境、空氣等等都啱仔仔多啲。但到佢14歲，知我鍾意拍戲，成日話自己OK叫我返香港，但我覺得生同養唔辛苦，最重要係陪佢成長，所以我堅持到佢讀大學，有自立能力先返嚟！」以戲喻教子的林嘉華，想來演了20年的戲還得繼續，沒完沒了，還活像個未出更的學警吧?!
