MorningDrive聽就聽得多，親身參與仲係第一次，諗起拉利、林寶同波子晒冷Show，仲有李英健揸架「飛機」Spyker出現，晨早陸續踩入大美篤嘆早餐，總值成兩億嘅名車霸晒錶位停車場，成件事無錯係好有型，但點解要5:30am集合咁殘忍？莫非有錢佬唔使瞓？
記者：徐影龍
攝影：陳陶鈞
估唔到快過李英健
毫無疑問，同我一樣未玩過MorningDrive嘅人，想像中會係一堆靚車鬥快劈入新界，而揀星期日晨早出發，係貪路面無車，可盡情踩油門，所以滿懷期待等睇好戲，就算捱眼瞓四點幾起身，飛的出公主道油站集合都無問題。
等到李英健（Marchy）揸架Spyker現身，我急不及待扣好安全帶，入定一波，準備跟隨Marchy人車合一澎湃衝刺。點知佢冷冷拋下一句：「我哋慢慢揸，唔使驚。」沿途真係循規蹈矩唔超速，後面大寶、拉利又無意識爬頭，搞到我架CooperS反而下下就番佢哋，估唔到我都有機會快過李英健。
如遊車河般令到睡魔Call機狂響，慢溜到大美篤巴士站後，卻即時被眼前景象所嚇醒。偌大一個錶位停車場，擺滿大細林寶、拉利360同430、波子GT2同GT3等歐系超跑，唔使逐架數都知起碼過百部，係咁意當每架值二百萬，閒閒哋成兩億泊喺錶位。
喪炳政府零支持
原來呢度逢星期日朝早，都係呢班有錢人聚腳地，為嘅係郁吓架車、見見老友，嘆住餐蛋麪吹吹水。對於街外人誤解佢哋屬飆車同晒命一族，都好無奈，捉住我話要向傳媒澄清，李英健更係力數政府漠視車壇，睇完靚車，原來佢哋仲有嘢呻。
李英健
（亞洲寶馬方程式總冠軍）
賽車係一種運動，政府將佢同飛車畫成等號，成日怪啲人喺街度飛，無諗過攞笪地出嚟畀我哋合法健康咁玩。
Michael
（CarProGM）
新加坡瞓身搞完F1，將金融海嘯效應推遲三個月，香港啓德塊地夠大，又有海景，係搞F1嘅最後機會！
Arthur
（PorscheClub）
好多人覺得我哋玩車隊拉龍係晒命，你諗吓，晒命使乜揀周日朝早出車？黃金時間喺中環拉龍咪仲引人注目。
王先生
（F430車主）
我哋好斯文，純粹每個禮拜遊吓車河、見吓朋友，真正飆車我會留番上珠海，喺香港就無謂搵命博咯。
