美國聯儲局將斥巨資狂購國債，猛印鈔票之下，市場憂慮美元後市勢將持續貶值，刺激金價急漲，一眾金礦股狂飆，升勢最勁當數招金礦業（1818），收市競價時段挾至全日最高位11.30元，升幅達17%。
美元大貶值，港元與之掛鈎，難免受拖累一齊「唔值錢」。有股友一言驚醒，銀紙「唔值錢」之下，有乜最能保值，甚至有機會升值，黃金石油礦產資源？係人都知，但以香港呢個「彈丸」之地，似乎「磚頭」在銀紙「唔值錢」情況下最具保值及升值潛力，所以呢位股友認為，本港地產股應有留意價值。
候25元上車
剛公佈中期業績的恒基地產（012），股價本月中已升破由今年1月初高位34.10元延伸的下降軌，近期在27元水平上落，昨日隨大市下跌2.6%，報收26.20元，短線走勢似受制50日線阻力。如果想買，可吼回至25元邊「上車」。
坊間券商對恒地評價都幾參差，其中高盛睇法麻麻哋，認為其財資業務表現令人失望，因而調低恒地2009年至2011年度每股盈利預測，其中09年調低8%，維持「沽售」評級，12個月目標價得24.35元。不過，大摩及摩通則稍為睇好些少，觀點主要係恒地估值不高、土儲成本低，係地產股中較具防守力股份之一。
方星俠