失業率有排未見頂，特首煲呔日講夜講撐企業、保就業，三令五申要求政府上下創造職位製造就業機會，佢身為特區最高領導人，當然要以身作則，否則難以服眾。喺新財政年度，特首辦果然增加就業機會，新增三個職位，令特首辦編制達到100人水平。
年薪20萬專睇電郵
特首辦現時編制97人，養埋咁大棚人睇落都幾臃腫，追多三個，可能係想扭轉民望頹勢。事實上增設嘅三個職位，都各有任務，並唔簡單。據特首辦提交立法會資料，其中一個新增職位係助理文書主任，年薪約20萬元，主要負責睇電郵！
大家冇睇錯，特首辦確係要請多個人專責checke-mail。原來過去一年，特首辦每日平均收到390個電郵、電話同信件，即係一年要處理超過14萬個各式訊息，現有兩個行政主任同三個文書職系人員，五個人做到氣咳，所以要請多個人。
另外兩個新增職位都係高級政務主任，人工更可觀，每年總共要200萬元。呢兩個高官，會喺特首辦做乜呢？特首辦話其中一個負責進行研究，至於研究甚麼，係咪幫手做民調、谷民望，特首辦冇解釋。特首有中央政策組做智囊，已經請咗好多人為煲呔做研究同民調，甚至數7.1遊行人數，咁都未夠，要喺特首辦加多個人做相同工作，實際有幾多作用，好值得質疑。
打個譬喻，即係屋企已經有個煮飯婆，又要請多個人返嚟炒幾味，乜嘢意思先？如果中策組交唔到功課，何不摺埋佢幫納稅人慳番啲錢？煲呔嫌啲嘢唔啱食，冇理由要市民幫你埋單付鈔！
為重整特首辦鋪路
另一個新聘高官，則負責跟進特首各項工作承諾推展情況，集中處理《施政報告》及其他公開場合提出嘅項目成果。八方從字面理解，即係搵個人執頭執尾，總之煲呔平時講過乜嘢，金口開出嘅期票，就由佢跟手尾。呢個新增職位，工作性質同特首辦主任都幾相似，唔通係特首辦副主任？現時特首辦主任陳德霖另有高就係公開秘密，今次特首辦擴充編制，可能係煲呔重整特首辦前奏。
mailto:[email protected]