星期三下午，打開馬經，想搵番隻穩陣馬膽之際，電視正在直播立法會會議，講緊大學教育資助委員會。議員發言，甚有娛樂性，李卓人議員做棟篤笑可以頂得住詹瑞文。聽立法會「辯論」，有時悶到抽筋，有時可以笑足半日，香港議員啲演技，十分頂癮。
睇睇吓電視，無甚「足聽」，於是睇番報紙如何報導，咁啱嘅，星期三《明報》有林本利副教授講「教資會研究評審毒害學術界」，標題好嚇人。教資會轄下嘅「研究資助局」運作十分獨立，負責評審本地大學研究及撥款，呢個「研究資助局」（ResearchGrantsCouncil）毒害香港學術界？咪罪大惡極？林教授似乎對之認識甚深，恨之入骨噃。林教授係理工大學會計及金融學院副教授，該學院（SchoolofAccounting&Finance）隸屬商學院（FacultyofBusiness），商學院院長就係會計學講座教授徐林倩麗，徐太剛剛好又係RGC委員，睇怕徐院長睇完呢篇林副教授鴻文，都要虛心向後者請教吓，RGC如何毒害學術界，如何影響理工大學之研究及大學運作。
林副教授講到：「香港只有七百萬人口，又是否需要有八間專注研究的大學？」如果有人問左丁山，一定答唔需要，其實好幾年前，UGC已指出香港有三間綜合研究型大學，就係港大、中大與科大，但其他大學校長點肯默認呀，咪一路去爭取研究經費，擴大校內嘅研究活動囉！各校長各為其主，為自己大學爭取校譽與利益，此非RGC之錯也。如果理工大學嘅校長及教授們個個認同林副教授嘅講法，注重教書而唔爭取公帑做研究費，唔通RGC會逼佢哋做研究咩。
同日IHT有一篇報導講美國嘅州立大學面臨各州經濟不景，預算大減，苦不堪言，其中亞利桑那州立大學校長MichaelCrow七年前上任時，誓言將ASU變成大型州立研究型大學，2020年達標。點知今年遭受空前財政困難，州政府大力削減撥款，ASU只得裁員五百人，包括學院院長、講座教授、助教、導師等等。此外又撤消四十八項課程，每一位僱員，包括Crow在內，放十至十五日無薪假期。ASU要做研究型大學已經夢碎，加州大學校長MarkYudof話明研究型大學非常昂貴，好多州立大學只應注重教學！香港以此類推，有三間研究型大學就似乎啱數。