無綫劇集《學警狙擊》Laughing哥「一死以謝天華」的一集，有網民開post設悼念區，有邊睇電視邊留言：「死緊喇」、「死咗16秒」，同聲為Laughing哥crying。
第1集Laughing哥向江世孝爆杯已經好搶，但當時劇集仍未煲起。第8集Laughing哥向江世孝投誠，同日報章港聞版刊出「謝天華認醉駕候判，不排除判監」。原來謝天華跟湯盈盈一樣咁大鑊！
劇集中有孤兒仔Laughing哥為顧全大局，以死成全吳卓羲，現實中有人指謝天華險身陷囹圄成反面教材。經此一役，夫妻情更進一步。
撰文：比華利
政府立例重判醉酒駕駛，藝人更是公眾榜樣，早前醉駕罪成的謝天華，被判緩刑1年、停牌18個月。案件正式完結，天華才稍現笑臉，他坦承判決前心情比較忐忑，曾憂心萬一收監，事業和家庭都毀於一旦。
醉駕事件已畫上句號，天華自言十分後悔，並再次誠心向受事件影響的人致歉，他說：「我首先好抱歉，我向當日捲入事件嘅的士司機道歉，其次係太太Tina同我嘅屋企人。」當然包括謝媽媽，天華謂醉駕事件後，一直隱瞞母親，可惜紙包不住火，他說：「我唔同媽咪坦白，係唔想佢老人家擔心，點知報道出街，好多人同佢講，搞到媽咪好緊張，仲不停同我拜神祈福，我真係好感激屋企人嘅不離不棄。」
接受全港人監察
醉駕事件頻頻，港府立例嚴打醉駕，難怪消息一出，不少輿論狠批謝天華身為藝人做壞榜樣，問他可擔心今次事件會破壞形象？他說：「咁我一向都唔係乖乖仔。」因為今次事件，令他變成全城的反面教材。天華說：「呢件事絕對係我個人歷史上一件大事，希望大家都以我做反面教材，飲咗酒千祈唔好揸車，因為條路唔係淨係得你一個人行，仲有好多使用者，自己一個錯誤判斷會好影響別人。
「有辦畀大家睇，我嘅朋友都即刻警惕自己，戒晒飲咗酒揸車嘅習慣，對人對己，做乘客安全好多。不過家我被判刑，以後我唔單只更加奉公守法，我仲成為全港巿民監察嘅目標，一定唔容許再行差踏錯。」冇行差踏錯，但宣判不久卻有傳媒火速刊登其攬女舊照踩多腳，幸好太太Tina投信任票，因為曾經共度患難，相比候判時那種不安恐懼，該照片算得甚麼？醉駕事件上，Tina要承受的壓力絕不比天華少，其間她一直堅強撐夫，天華卻踢爆太太表裏不一，他說：「我知佢心底裏其實好擔心，或者佢嘅眼神呃到大家，好多謝佢一直陪住我。」
「衝多幾年生BB」
年屆41歲的天華結婚多年，近年演藝事業已上軌道，卻未見他心急造人，他說：「家公司派好多嘢畀我做，現階段我都係想專注事業發展，衝多幾年先計劃生BB。」
問到天華此後可會戒酒？他說：「有時應酬飲少少酒好難免，我唔會因為自己停咗牌，冇得揸車仲有恃無恐係咁飲，為咗健康會節制啲。」向來習慣揸車代步的天華，被判停牌，猶如變成跛腳鴨，故此馬上聘請了司機接送，他說：「我呢個安排順便促進就業機會，對抗海嘯，我請個司機，佢又可以做埋我嘅助手，處理一下我嘅私人嘢。有司機接送開工，我可以爭取多啲時間喺車休息吓，開工都精神啲，一舉兩得。」
話你知：Laughing名字由來
謝天華在無綫劇《學警狙擊》飾演的Laughing哥，名字由來其實是他的劇中姓名梁笑棠的「笑」字的英文解釋。據悉，無綫為謝天華的角色改名時，套用了其中一位編劇的好朋友「笑棠」這個名字，但最初謝天華劇中別名是叫「棠哥」或「阿棠」，並非Laughing哥，但最後認為「棠」字不夠響及太過普通而棄用。由於Laughing哥這名字夠響又易上口，現時除市民外，不少無綫藝員見到謝天華也會叫他一聲Laughing哥！
卧底慘死牽動人心
棄歌從視的天華，06年在無綫劇《女人唔易做》中扮演賤Man一角備受讚賞，近日在《學警狙擊》中演Laughing哥再掀高潮，網民開post收錄其經典金句：「咁我唔叫Laughing，叫Crying囉！」、「上帝要你滅亡，必先要你瘋狂」網民還力撐他做台慶頒獎禮最佳男配角，更有不少人揚言Laughing死後，已再無慾望追看下周五的大結局。
本周劇情講述Laughing哥慘遭槍殺，下場悽慘，天華不介意角色未能由頭帶到尾，他說：「咁樣個角色先入心入肺。」他謂當初接到《學》劇劇本時，花了很多心思和時間去揣摩角色，他說：「Laughing哥呢個角色性格好難拿揑，有好多內心鬥爭戲，有口難言，需要用眼神表情去交代，眼神就係演技最高境界，對我嚟講真係一個考驗。我好幸運得到監製安排我演卧底角色，因為往往呢啲角色會好吸引觀眾投入去睇。」
隨時候命拍前傳
Laughing哥一角特別鮮明，天華卻謙虛說：「其實唔係單單Laughing哥一角最出，其他演員都演得好，呢次套劇咁成功，主要係teamwork，大家都有功勞。」網友提議無綫乘勢開拍《Laughing哥前傳》，天華說：「我好多謝網友咁有創意嘅idea，不過公司開拍一套劇，要顧及好多問題，我尊重公司安排，反正我謝天華喺度，24小時隨時候命。」學Laughing哥話齋，個天畀你行你先好行，個天唔畀你行，你郁都唔好郁呀。
天華扮演的Laughing哥和賤Man都好評如潮，為他帶來不少滿足感，他表示還很喜歡劇集《鐵咀銀牙》中的方唐鏡，他說：「總括呢三個角色我都好鍾意，畀到我好大發揮空間。」
網友惡搞舉世哀悼
「Laughing哥於2009年3月18日殉職離世，現正舉行追思晚會。」「香港卧底探員Laughing殉職」無綫新聞報道。Laughing哥一死以謝天華，舉世哀悼，網民隨即發揮惡搞本色，將其殉職的新聞大事報道，包括在壹蘋果網絡、Yahoo!首頁、無綫新聞、甚至msnbc.com（右圖）都有，另外還製作花牌，寫上「浩氣長存」的輓聯（左圖）。Laughing哥，安心上路吧！
