政府噚日一口氣公佈多個公職任命，電影發展局有三個新委員，分別係陳可辛、朱家欣同盛慕嫻，前兩者係電影業知名人士，盛小姐係會計師，三人任期下月起至2011年3月底。電影發展局主席係蘇澤光，本來只有一個副主席，由商務及經濟發展局常秘出任，今年起增設多一個副主席，由委員之一林建岳出任。
岳少做電影局阿二
岳少係新晉電影大亨，投資嘅電影叫好叫座，又同政務司司長唐英年老友，上位好正路。有關方面話由於電影發展基金申請大增，令該局工作量增加，蘇澤光又貴人事忙，所以新增一個副主席幫輕吓工作。
房委會亦有新人加入，分別係蘇偉文、蔡涯棉、方剛、葉國謙、黃國健同梁家傑，接替陳鑑林、單仲偕、廖勝昌、張宇人、施永青同李國英，主要係業界同政黨代表換血，爭議性不大，其中梁家傑應該係首個加入房委會嘅公民黨議員。
梁家傑曾與煲呔「角逐」特首，近年罕有獲委重要公職，連市建局非執董個位都冇埋，今次加入房委會，唔知算唔算關係解凍？