PSP史上最難槍Game△○╳□當準星

《Resistance》已經成為Sony旗下殿堂主觀射擊Game，今次嚟到手提機PSP，畫面由第一身變成第三身，即係會見到自己後尾枕，玩落無咁頭暈。而且因為PSP硬件所限，要用右邊4粒掣（即△○×□）控制準星，咁鬼難㩒，所以就番你畀個大啲嘅準星你，中槍判定都寬鬆咗，好易就打爆班合成獸個頭。副題係Retribution，呢個「報應」好爽！

文：大條承太郎

神槍手唔會嘔

筆者平時唔係好掂主觀射擊Game就係因為怕暈「機」浪，今次拚死為人類而戰，玩咗兩粒鐘都無作嘔。轉咗視點視線闊咗，唔使行路頭擰擰，風格唔同，簡單嚟講我就覺得易玩咗。
不過咁，因為PSP得左邊一個類比控桿用嚟控制角色移動，十字掣就換槍，R掣就繼續係開槍，最大鑊就係要靠右邊4粒掣（即△○×□）控制準星，變相又令難度高番啲，所以今次你會見到個準星特別大，而且射擊判定都較鬆，人人都係神槍手。

■同第二集一樣，敵人有巨型機械，好有迫力。

■廠方話今集會再解開少少Resistance謎團。

■新技術整地圖，再加MotionCapture，畫面幾滿意。

發脾氣炸基地

今次換咗主角，故事類似外傳形式，時間就設定喺第一集數周後，第二集之前。一開波叫JamesGrayson嘅主角就見到自己兄弟被合成獸改造緊，眼見兄弟就快失去人性，James焗住殺死咗佢。俾個天咁玩法，有乜理由唔發火，一發火，就單人匹馬將合成獸個基地打爆咗，從此揚名立萬被睇起捉咗去法國繼續打怪。人怕出名豬怕肥，所以話呢，唔好成日發脾氣嘛。

■巨大合成獸都會出現，不過就無第二集幾廿層樓高咁誇張。

■可以搵掩護，而且掩護時都有準星，咁咪好着數？

■今次都會潛水打怪，要留意心電圖上面嘅氧氣量。

聯動舊作用DualShock

不再由原來開發公司InsomniacGames負責，而係由SCE旗下BendGameStudio製作，不過都保留番好多前作元素，例如武器依然係一雞兩味有兩種射擊形態，戰略多變多樂趣，另外亦會新增長弓、狙擊槍等新武器，敵人都係有大有細嘅合成獸同機械。
仲有！今次可以同PS3嘅《Resistance2》連動，可以開啓隱藏玩法，仲可以用番第二集登場嘅武器，而且同PS3連線仲可以用DualShock3嚟玩，手感返晒嚟！遊戲仲支援8名玩家聯機對戰，都係分隊互隊同搶吓旗仔咁，又多隻Game圍埋玩，呢排好忙喎！

■電腦AI幾強，有同伴幫拖，個心都定啲。

Profile

遊戲平台：PSP
製作廠商：SonyBendSTUDIO
遊戲類型：射擊
遊戲人數：8人