淫照女主角之一鍾欣桐（阿嬌）接受《志雲飯局》訪問時直認咁多個男友中，最愛係淫照經手人陳冠希（Edison），雖然家佢哋變成陌路人，但估唔到仍然緣份未了！噚日阿嬌坐傍晚機去北京出席今日嘅牛仔褲活動，點知咁啱得咁蹺，Edison嘅爸爸陳澤民同佢同一班機去北京，但陳澤民早一步到機場，入閘前冇遇到阿嬌，但唔知佢哋喺飛機度會唔會碰面呢？
陳澤民單拖去櫃位辦登機手續，記者問佢擔唔擔心Edison被恐嚇，佢就當聽唔到。記者繼續問，最後佢答咗句：「多謝你哋，我真係冇嘢講。」之後匆匆離開。
「會sayhi」
阿嬌就由經理人霍汶希陪同出現，講到同陳爸爸同機，佢尷尬話：「唔知喎，但會sayhi，唔會尷尬。」問到係咪同Edison拍拖時見過陳爸爸，阿嬌好細聲話係。有指佢俾內地汽車品牌飛起，阿嬌話：「我會面對，希望內地朋友接受我。」至於緋聞男友麥浚龍（Juno）俾人話喺派對上狂低胸女，阿嬌話：「唔關我事，朋友鍾意點就點。」之後揮手入閘。
Juno原有份出席澳門時裝店開張，但臨時唔見佢出現，唱片公司話根本冇落實出席。