屋企裝修我鍾情日式「無菌」一室全白，講到食我都一樣無菌不歡。天氣轉熱，個人無乜胃口，口感清爽的雲南菇菌低脂、含豐富氨基酸，對皮膚好有益。雲南山區「藏菌量」豐富，因利乘便，滇菜就慣用多種刁鑽菇菌入饌，最啱春天食。
記者：吳允冲
攝影：伍慶泉、陳盛臣
模特兒：IrisYip@StageModels
黑松露肉丸$78
來自雲南的野生黑松露，不像法國的只得一絲煤氣味的幽香，味道更濃更霸道。切碎灑在雲南肉丸上，令本身味道如上海獅子頭的肉丸更添香氣，矜貴得多。
雲南藏菌量豐富!
虎掌菌似食老虎肉
阿詩瑪老闆Winnie是雲南人，以往經常上山採野菌，點揀靚菇菌佢瞭如指掌：「五千幾隻菇菌中只有大約五百款可以食，菇菌隻隻都有不同個性的味道，都是以本身特性、外貌來命名，像虎掌菌無論花紋、氣味都似老虎肉。味道則可分為清香、濃香、芳香三種。」店內供應的菇菌就有濃香的黑松露、羊肚菌等三十多種，坊間不易食到，用來椒鹽、放湯、包春卷、炒蛋都得，最重要係低脂肪、抗衰老，含豐富氨基酸，對皮膚好有益，食一餐好過去做facial。
黑松露豬先食
「豬拱菌」聽個名以為係cheap貨唔矜貴，原來是黑松露的雲南別稱，法國老饕譽它為黑鑽石，雲南人卻笑他們同豬爭食，因為黑松露生長在泥下，豬一聞到其獨特氣味就會走去「哄」，繼而將黑松露吞落肚，才有「豬拱菌」之名；連日本人趨之若鶩的松茸，雲南人都話nogood。Winnie話要食就要揀雲南名菌，好似雞樅菌、乾巴菌、牛肝菌、羊肚菌，都係雲南人最愛。除了食野生菌，雲南人更會將菇菌曬乾，咁就一年四季都食得啦!
香酥虎掌菌$78
虎掌菌是雲南名菌之一，手掌咁大，表面有濃密茸毛，黑色紋似老虎爪。乾製過的虎掌菌香味比新鮮的更濃郁，香味同黑松露有得揮，遇熱力時香味傳千里，沾上脆漿後炸，外層鬆脆，內裏菇味濃郁，加上炸麪包粒，送酒最啱。
紅菌香酥肉煲$68
乳牛肝菌是雲南名菌，雲南香酥肉以半肥瘦豬肉手剁而成，以香料醃後沾黃豆粉炸，酥香有肉汁。加紅菌、萵笋煮成煲仔菜，風味十足。
野香菌茉莉花炒蛋$48
五毫子大的野香菌清香，Winnie形容係森林的味道。茉莉花有養顏明目作用，花蕾未開時採摘特別香。食落花香比菌味突出，爽滑的菇與炒蛋很夾。
阿詩瑪（31882555）
旺角彌敦道639號雅蘭中心6樓E舖
日常菇菌一樣有益!
鮮鴿拆肉炒黑白雙耳
雲南菌要捐窿捐罅去搵，其實平日街市買到的草菇、蘑菇都已好有益。帝苑軒總廚施師傅就用幾款常見的菇菌炮製了多款特色新菜，廣東式煮法更合口味，營養同樣豐富，好多日本客捧場。扮孝順仔女，記得帶埋阿媽去食飯偷師。
雙耳炒鴿鬆$118
將爽脆的木耳、雪耳切碎，乳鴿拆肉炒鬆，好花心機。口感清爽，春天最啱。
蝦子百花釀竹笙$108
鮮蝦打成蝦膠釀入竹笙，清淡中食到蝦甜味，蝦子可吊起鮮味。
大地魚末草菇炒墨丸$88
墨魚丸彈牙又鮮，加了大地魚末更惹味，大大粒草菇口感十足。
雞髀菇黑椒牛柳條$108
牛柳條向來受歡迎，以黑椒雞髀菇同炒，無人唔鍾意食。
帝苑軒（27242666）
尖沙嘴麼地道69號帝苑酒店B2層
