樂壇天后陳慧琳（Kelly）願望成真了！懷孕4個月的Kelly一直恨生仔，昨日她出席時裝活動時再度報喜，宣佈一索得男。貫徹型媽打扮的她，昨日亮相時明顯身形較前圓潤，腰肢渾圓，腹部微隆，更有孕婦的谷奶現象。Kelly表示近日體重暴增9磅，上圍變大，不過B仔相當百厭，經常踢媽咪。
年屆36歲的陳慧琳向來順風順水，出生富裕之家，加入樂壇後又一炮而紅。去年Kelly與男友劉建浩（Alex）結婚，曾表態恨生仔的她婚後一個月即造人成功，昨日她在半島酒店出席德國時裝品牌MarcCain活動時再度報喜，她高興地說：「照咗係仔，99%都準㗎啦！」
戒食甜品
上網搜購嬰兒用品
堅持作型媽打扮的Kelly，昨日仍然腳踏兩吋高踭鞋及穿低V裙示人，現時懷孕4個月的她明顯比前豐腴，腰肢渾圓，腹部微凸。她上台參加祝酒儀式後，大會便舉行時裝騷，活動將近結束時，在場一班內地買家見Kelly如蟻摟蜜糖爭相合照，令她驟變人肉佈景板。
心情靚絕的Kelly對此毫不介意，接受記者訪問時更急不及待與眾分享生仔喜悅，問她是否希望一索得男時，她不諱言道：「都係㗎，雖然仔女都OK嘅，老公知道我有咗BB已經好開心。」又透露連日來已為BB掃了不少貨，上網訂購丹麥出產的嬰兒車及BB枱凳，她笑說：「到呢兩日知道係仔之後先開始買BB衫，老爺同我爹哋媽咪都好開心。」Kelly稱會與丈夫一起為孩子改名，依據夫家族譜，名字應是單字，但中、英文名暫未有定案，記者建議她可為BB改名「劉華」，她只笑不停。
問到陀B會否辛苦？Kelly說：「肚有啲嘢都辛苦㗎，BB勁踢我，初頭唔知以為係胃氣，佢可以參加明星子女足球隊。家我食好多魚同菜，戒食甜品，食甜品係自己肥，但BB唔吸收。」她又謂近日肥了9磅，問到有否谷奶升Cup？她直言：「大咗少少。」
除戒甜品外，Kelly也戒劇烈運動，她說：「騎馬、游水、爬山同bungyjump都唔玩，係做pilates（拉筋動作）。」求子一擊即中，不知會否追多個女湊成好字？她說：「睇吓生仔辛唔辛苦，易又唔痛嘅話會追，如果辛苦就收爐。」
今年8月是Kelly的預產期，她表示會先向醫生查詢意見，再視乎健康情況及肚內BB位置才決定自然分娩抑或開刀，至於Alex是否入產房陪產，則由丈夫自行決定，她說：「睇吓佢怕唔怕血，我都未知係順產定劏肚。」
母乳餵哺
與內地媽媽搶奶粉
熱愛工作的Kelly仍未言倦，揚言繼續開工，她說：「自己身體都OK，臨盆先至收爐。」近年時興藝人母子檔拍廣告，Kelly稱暫未聽過有人向她打主意，提到近日內地規定藝人要為代言食品負責任，Kelly投以贊成票，她說：「有人食咗忽然有事，自己都唔安樂，但都冇乜人搵我拍食品廣告嘅。」
活動後Kelly接受記者電話訪問時，表示會餵BB食人奶，且為免與內地孕婦爭買奶粉，會未雨綢繆早早預訂，她說：「家有好多內地孕婦嚟香港買奶粉，我會訂定啲奶粉先。呢排我同Alex成日上網睇育嬰指南，家對培養嬰兒都有初步認識。」其經理人鍾珍則透露，Kelly生仔時會保存臍帶血以備不時之需。
採訪：顏英儀 攝影：陳慧安
小八卦：大肚婆怕熱焗出汗
一向以靚行先的Kelly，昨日出席活動時繼續打扮亮麗，可惜不慎失手，腋下位置出現大灘汗漬濕透衣衫，微微扣分。事後Kelly表示這是因大肚婆怕熱所致，她說：「大肚係熱啲㗎啦！同埋今日現場有啲焗，所以咪流汗囉。」
相士話：牛仔富音樂才華
現年36歲的陳慧琳懷孕4個月，預產期為今年8月，她昨日表示腹中塊肉是男嬰。堪輿家楊天命指Kelly即將榮升牛媽媽充滿福氣，他昨日在電話中說：「牛BB嘅性格好頑固同有毅力，不過BB最好喺新曆8月7日後出世，過咗嗰日就踏入秋天，命格重金，會行木火運，咁啱今年嘅牛仔過咗嗰日出生，仲會一生行運。」
另一堪輿家吳佩孚指Kelly命中注定可生兩子一女，現在首胎是男嬰更加理想，他說：「Kelly嘅牛仔喺8月出世，五行旺金，好有音樂才華，適合喺娛樂圈發展。」
麥玲玲則說：「Kelly嘅BB喺下半年出世，好旺金，思想創作能力好強，肖鼠嘅Kelly同牛BB好夾，牛BB嘅性格好主觀同硬淨，係咁多生肖中最勤力嘅。」
娛樂資料庫：娛圈追仔一族
陳慧琳婚後不久即懷孕，如今更證實一索得男，可喜可賀，其實圈中人不少人均十分想生仔，可惜生極都係女。
資料來源：《蘋果》資料室
徐子淇
07年7月為李家誠誕下千億B女李晞彤，被傳渴望為夫家誕下男丁的她，去年再度懷孕，預產期為今年夏天，有傳此胎仍是女兒。
王菲
97年為前夫竇唯誕下竇靖童，05年為丈夫李亞鵬誕下女兒李嫣，有傳李亞鵬十分希望王菲能再為他生仔。
張學友
張學友與羅美薇婚後育有一對女兒瑤華與瑤萱，有指二人本來也十分希望有個兒子。
邱淑貞
為丈夫沈嘉偉誕下兩名女兒，曾表示仍想繼續追仔。
鄭少秋
前妻沈殿霞生前為他誕下女兒鄭欣宜，有傳渴望有後的他，其後與官晶華再婚，官為他誕下女兒詠恩和詠曦。
