睇住佢大，睇住佢……公民黨噚日三歲生日，黨高層舉行切蛋糕儀式慶祝，黨主席關信基話三歲定八十，公民黨嘅處事風格相信市民有目共睹，「應該係好有型嘅一個政黨」。至於生日願望，佢話最想中央政府信守承諾，畀香港盡快落實普選，唔好白費公民黨努力。
余若薇白髮冇多到
黨魁余若薇則話，三年真係一段好長嘅旅程，回想呢千幾日，真係百感交集，慶幸從政後白頭髮好似冇多到。佢話公民黨過去三年提出好多政策建議，今年重頭戲就係綠色經濟。據公民黨人透露，黨高層早排私下見過唔少商界朋友，包括美國、加拿大、澳洲等商會成員，佢哋都好支持綠色新政，希望政府可以搞好香港空氣質素。
雖然公民黨同商界咁好傾，不過湯家驊噚日話，同中聯辦卻斷絕來往。佢透露04年有位周姓官員，曾邀請45條關注組成員去中聯辦，但自從呢個官員離職，中聯辦就再冇接觸佢哋，佢認為中聯辦既然負責聯絡香港各界人士，冇理由對公民黨「另眼相看」，否則可能有人失職。