今年係中國建國60年，對5月就退休嘅恒生（011）大班柯清輝嚟講好有意義，因為佢係喺建國年1949年出世，噚日佢拍住港大首席副校長王于漸教授，同埋青協總幹事王䓪鳴，喺「青少年教室」開展禮上分享建國60年嘅看法。柯大俠無限感慨咁話：「我可以話係同國家一齊成長。」佢小學喺內地讀書，圍過紅領巾（即係做少年先鋒隊）。
柯大俠話，當時小學教嘅嘢好實際，最深印象係學捉老鼠、曱甴同麻雀。由於當年佢阿爺有地主成份，子孫只可以讀到小學，為咗繼續升學，屋企人就將佢送嚟香港。
柯大俠話，大躍進受到嘅經濟痛苦令佢感觸更深，家人每次回鄉都會帶好多物資返去。
正因為有深切體會，所以柯大俠見內地家陣發展得越嚟越好亦感到驕傲。柯大俠話，喺滙豐同恒生見過唔少員工被派往內地時，都耍手擰頭，佢勉勵在座嘅高中生，唔好抗拒到內地工作，反而要爭取認識同參與，因為嚟緊中國有好大商機。
李華華
電郵：mailto:[email protected]