張愛玲最後一本小說《小團圓》出版後，立即成為暢銷書，聽講一版二版已經賣晒，分析K一早預聞出版，在相熟書店訂購，至今仲未收到書，因為書局連熟客訂購嘅，都一概發售埋，分析K唯有等等等。張愛玲啲小說，並不易讀，以前係學者/文人，個別讀書人先至鍾意，點知李安拍完《色，戒》之後，張愛玲變成大紅人，帶動佢啲遺作熱賣，於是佢本最後創作《小團圓》肯定成為○九年最暢銷文學小說。
名家如蔣芸、李怡、劉紹銘等都對《小團圓》有苛刻批評，認為此書有不少敗筆。算嘞，作家紅起上嚟，讀者怎會理會批評之言吖。聽分析K講，佢最鍾意之張愛玲作品就係《金鎖記》，佢以為呢本係描寫中國婦女，特別係怨婦之第一奇書，一個在好多人眼中係奸角嘅女人竟然得人同情，得人憐惜，可見張愛玲描述怨婦心理之深刻。
戲劇高原來亦有同感，佢話：「一個怨婦，遇人不淑，將報復心理轉移至兒子及女兒身上，故意破壞兒女婚姻，因自己冇幸福而令到兒女同樣冇幸福，行為本甚可怕，但睇得深入啲，讀者又會對佢十分同情，甚至認為佢嘅惡毒可以理解，張愛玲真係高手！」既然咁講，戲劇高即係好鍾意《金鎖記》之戲劇張力啦，唔怪得佢嘅摯友焦媛將《金鎖記》搬上舞台，劇本來自上海市作家協會主席王安憶女士，再搵埋著名女導演許鞍華，第一次導演舞台劇，於是原著、劇本、導演、製作人兼主角皆為女性，一定唔會含有男性之「歧視性」角度。
商務印書館特別為此舉行一個「張愛玲與我的《金鎖記》」座談會，今日（三月二十日）下午七點在尖沙咀美麗華商場嘅商務旗艦店舉行，請馬家輝做主持，搵到王安憶女士專程自上海趕到，同許鞍華一齊主講，張愛玲迷大可到時入場與嘉賓及主持交流心得，費用全免，相信焦媛與戲劇高到時亦會在場啩。張愛玲小說搬上舞台，賣座最旺嘅應該係《傾城之戀》、《金鎖記》，乘《小團圓》熱潮，照計票房亦有保證。