律政司司長黃仁龍上任幾年刻意低調，甚少談及私人生活，噚日出席馬會獎學金頒授禮時破例，佢話就算工作幾忙，都會盡量抽時間陪兩個寶貝女，如果細女嫌爸爸唔夠時間陪伴，就會唔理佢，唔同佢傾偈玩冷戰；相反，陪伴時間越多，細女就越黐佢。
黃仁龍又話，加入法律界其實係被迫，因為怕血唔可以讀醫，計數又唔叻，所以讀law。學生睇得戲多，有人問司長做律師係咪要好蠱惑。黃仁龍講咗個古仔，話自己初入行時，有個危險駕駛的士司機搵佢辯護，但對方證供好唔合邏輯，似另有內情，佢要求對方從實招來，或者另聘高明，結果司機選擇講真話，因此黃仁龍話做人都係老實啲好，誠信最重要。