香港迪士尼擴建呢壇嘢，真係一波未平，一波又起。華特迪士尼日前以擴建談判冇進展為由，高調炒咗30個「幻想工程師」，大家以為迪士尼放軟手腳，點知話咁快，網上已經有一股擁米老鼠勢力出現助拳。
話說facebook上出現咗個group，希望延續奇妙夢想，支持迪士尼樂園擴建，成立兩日已經有400幾個會員。佢哋唔係齋講，部份人發起3月28日上午10點，喺樂園迎樂路正門集合，舉行「迪士尼好友夢想大遊行」，聲言人人着黑衫，帶齊各式迪士尼精品和平示威，要求政府盡快落實擴建迪士尼。
疑似卧底撐擴建
香港原來有人咁熱愛迪士尼，呢個group發起人好鬼認真，詳細介紹當年上海、新加坡同香港爭建迪士尼經過，交代埋港府同迪士尼談判擴建兩年冇進展等新聞，八方睇睇吓，好似睇緊迪士尼公關寫嘅新聞稿，唔通有人Laughing哥上身，做卧底幫迪士尼造勢？
《學警狙擊》個Laughing哥明明死鬼咗，無端端唔會喺網上翻生啩!?八方嘗試聯絡發起人，不過佢冇覆。呢個咁有心嘅迪士尼fans，對於擴建無期十分肉緊，鬧政府嘆慢板遲早搞死迪士尼，又批評傳媒「妖魔化」樂園，令大部份外界市民認為樂園唔掂。八方覺得呢位fans言重嘞，香港好多市民、傳媒都係迪士尼之友，有人仲話如果唔擴建迪士尼，香港會陸沉㖭，港府同迪士尼嘅輿論公關戰，一直互有攻守，玩到網上一樣精采。
「好多同事join咗」
唔少人喺facebook留言，八方發現部份網友嘅相片，係身穿疑似迪士尼職員制服喺樂園內留影，仲話「好多同事join咗呀！」八方唔肯定佢哋是否迪士尼職員，如果係真，咁呢個最新輿論戰嘅戰場都幾得意喎。
公關戰打到上facebook都未必有用，因為八方聽聞政府對擴建立場仍然企硬，堅持同迪士尼周旋到底。當年香港唔掂，同迪士尼講數時蝕晒底，被指簽下「不平等條約」，家陣金融海嘯，美國公司首當其衝，政府仲唔趁你病攞你命咩，使同你客氣！
mailto:[email protected]