廣東人愛飲茶，一盅兩件嘆一個早上。不過現今後生仔，大多瞓到日上三竿又貪快，唔鍾意上傳統酒樓。小記近日八到前四季點心師傅，連同前好彩點心師傅聯手發功，開設點心專門店。選址旺角，定價也旺角，點心卻是酒店級酒樓級。
記者：王震遠
攝影：伍慶泉、楊錦文
酥皮焗叉燒包$12三個
變奏自四季酒店精美點心，改用叉燒做餡。麪皮發起後，搓成包形放入叉燒再發酵，加上酥皮再焗香。叉燒包表皮脆口，酥香十足，內裏鎖住叉燒汁，鮮味香濃。
「左培右強」趁低發功
兩個入行超過30年的師傅，毅然放棄安穩工作，開設點心店。店舖裝修平實簡潔，正如他們的點心不賣弄花巧。點心專賣店，添好運不是獨家，培哥和強哥的經驗和履歷才是生招牌。培哥曾是四季酒店點心部主管，其招牌酥皮叉燒包就是四季變奏版；強哥曾是好彩點心部主管，也將好彩臘味蘿蔔糕和潮州蒸粉果的精粹帶過來。兩位師傅相識廿載，默契拍得住左麟右李，面對經濟逆境無有怕，除了對自己的廚藝有信心，也趁舖租低的時機，做老闆誓要闖出一片天。
即叫即做好食要等
添好運不像酒樓的運作，滲入了西餐形式，當上老闆，少了掣肘，可以專心做自己想做的點心。這裏大部份點心都是早上準備好，再視乎客量和落單即叫即做，令食物更新鮮，小店經營才有這種優勢。但培哥說，「試過有客人鬧啲嘢好耐都未到，放低10蚊茶錢就走咗。」想食靚點心，還請稍安無躁。要數這裏的招牌點心，一定是酥皮焗叉燒包，變奏自四季酒店、三個賣幾十元的酥皮燒鵝包，這裏棄用燒鵝，改用叉燒做餡，保留焗酥皮，旺角平民價$12，嚐到酒店級精美點心。
潮州蒸粉果$10（好彩）
源自好彩潮州靚粉果。粉果皮做得晶瑩剔透，餡料有蝦米、沙葛、花生和豬肉等，味道調得和味，食落香口。
香滑馬拉糕$9
古法製，用上一天時間發酵，顏色較深。口感軟滑，帶濃濃香味。
古法糯米雞$15
餡料有膶腸、冬菇、豬肉，加了葱油令糯米黏感減少，入口更爽更香。
臘味蘿蔔糕$10
蘿蔔糕粉少質感會較軟，用板燒法令少粉也不易爛，臘味煎香很惹味！
楊枝金露（未定價）
芒果肉打汁混和糖水及奶，加熟西米、金柚肉和芒果粒。芒果味極濃。
添好運點心專門店（23322896）
旺角廣華街2-20號翠園大廈二期8號地下
即拉葱花蝦米腸 㗎仔都愛
開業兩年的一點心，鄰近花墟及旺角球場，大街不算多人，但原來有不少熟客慕名而來，門口放了一排凳讓人等位坐，非常旺場。小店新式裝修簡單舒適，甚受年輕人歡迎。售賣的粵式點心，中點、餃類、包點、酥點，酒樓食到的都有，但做法卻不同。負責人楊先生說，酒樓大都以物流式處理食物，廠房生產再送至酒樓，時間長，新鮮度必降低，而這裏店內設有廚房，點心都即叫即做即蒸，如招牌的葱花蝦米腸，有柯打才在布拉腸粉機即時蒸製，味道鮮美，不止港人愛吃，就連日本遊客都食，還吸引到日本傳媒來採訪。
葱花蝦米腸$14
每日布拉腸粉機上蒸製。米漿的水和粘米粉比例適中，令腸粉帶粘米香味，配葱花和蝦米很香口。
薄皮鮮蝦餃$15
餡料採用越南鮮蝦，隻隻蝦餃皮薄透紅，蝦肉爽口鮮味。
奶皇香麻酥$10
少見粵式點心，自家搓酥皮包住奶皇餡，加芝麻再焗。有點像蛋撻酥，夠脆口。
一點心（27892280）
旺角運動場道15號
京華大廈地下1-2號舖
