不得不彈！劇情又係卧底滲入黑幫收集情報，你係警察我都係；不得不嫌悶，又係類似《GTA》類自由度高美式Game，邊行邊轟又飆車撞爆人好狂躁。咁仲有咩好講？背景係西班牙巴塞隆拿，採用Unreal3技術物理運算，炒車有火花、撞車有爆燈效果幾震撼，而且除私家車、電單車外，仲有柯柏文嗰隻大貨櫃過你揸，橫衝直撞唔使審，對唔住呀芯姐！
文：Loving哥
有頭髮邊個想做雲迪素
《Wheelman》係由MidwayGames、TigonStudios、Paramount電影公司以及MTVGames聯合開發，而且同名電影都會一同上市。講個古仔你聽先，從前有個秘密情報員，佢要滲入巴塞隆拿嘅黑社會，唔係要搵出「進興」製毒工場位置，但都係搜集敵方策劃嘅搶劫行動情報。而扮演主角嘅，就係拍過《xXx》、《ChroniclesofRiddick》嘅荷李活動作演員VinDiesel，咁隻Game就梗係用番佢個嘜頭，你操控緊嗰個咪就係佢囉，唔認得咩？
職業司機甩尾啪頭
聽到呢度，咁普通嘅劇情我睇《學警》好過啦！嗱嗱嗱，過癮之處就係VinDiesel混入黑幫時係個職業司機，手車夠辣又有副好身手，即係飆車夠狠，遊戲入面你可以唔使掛P牌表演各種邊飆車、邊攻擊嘅高難度動作，例如一個白鴿轉大甩尾射爆後面㗎車，掃射時仲有慢動作效果，不過呢招唔可以成日用，要儲滿個Focus計先可以用。另外射擊模式都有「颶風瞄準模式」同「高精度瞄準模式」兩種特殊技，即係一招亂咁掃一招齋啪頭囉。
巴塞實景搵美斯
落車之後，都有好多任務，例如跑嚟跑去救出同伴，再搶架車齊齊駁腳，有時仲會揸電單車喺窄巷左穿右插。無空間限制、無玩法限制呢方面，就一貫美式嘢啦！
想照電影劇情任務玩，就跟地圖雷達搵目的地，額外亦有過百個支線任務關卡。做得卧底梗係都可以漫無目的四圍搞事，呢個時候就可以欣賞吓巴塞隆拿嘅風景，實景建築物好吸引，LaSagradaFamilia教堂、BarriGotic區嘅古老小巷都有，不過就唔知有無魯營球場。
Profile
遊戲平台：Xbox360、PC
發行公司：Midway
遊戲類型：動作、賽車遊戲
遊戲人數：1人
推出日期：3月23日
