最近內地盛傳人行有意成立新部門，掌管同實施人民幣滙率政策，外界有好多猜測，之前有報道話個部門會叫做「滙率司」。噚日《第一財經日報》就報道，人行想將「滙率司」改叫「貨幣政策二司」，部門司長熱門人選，就係中金首席經濟師哈繼銘。有傳媒搵當事人求證，得到個好玄妙嘅答案。
話說滙港通訊打電話畀哈繼銘，點知佢只係講咗一句：「假的真不了！真的假不了！」真真假假自己估啦，果然係高人。呢位高人係美國堪薩斯大學經濟學博士，喺香港做過金管局經濟研究部高級經理，同IMF高級經濟師。
至於新部門改叫「貨幣政策二司」，報道話係因為唔止制定對外嘅滙率政策，仲睇埋對內嘅貨幣政策，所以改名貼切啲啫。不過，人行新聞處就回應話，新部門嘅設立「尚無明確的時間定義」。