身兼港交所（388）上市委員會委員嘅僑豐金融行政總裁許照中，噚日同傳媒食飯，華華亦係座上客，熱門話題當然離唔開滙控（005），許照中話早前喺60蚊賣咗手上嘅港交所，換馬買滙控，入貨價係42蚊，諗住第日留畀孫女喎。
估唔到「勁假時段」戲劇化咁將滙控質到33蚊收市，佢咪好唔開心？點知許照中話冇嘢噃，仲話噚日滙控收市都見42.7蚊啦，有信心會好番，仲叠埋心水等供股㖭。
許照中的確好撐呢隻大笨象，佢早前喺網上發表對滙控被質到33蚊嘅睇法，話大笨象係發鈔銀行，唔應該咁俾人質。不過有網友唔多認同，反指大笨象大勢已去喎，許照中語重心長咁叫網友唔好只向錢看，因為大笨象唔掂，香港都唔掂。家陣經濟不穩，啲人自然人云亦云，又有幾多人會聽佢講呢？