做人最緊要有夢想，好似哥連泰斯主席高比（MarioGobbi）咁，話有可能游說到球王施丹復出，同朗拿度再組夢幻組合玩轉巴甲！高比係咪吹水就未知，但近排皇馬嘅前「6條A」真係新聞多多；繼施丹俾人擺上枱話有機復出，其餘「煙屎」分子碧咸同魯爾，又成各大報章頭條，認真威水。
哥連泰斯擺施丹上枱
施丹掛靴之後，都係周遊列國踢吓衞生波、做吓慈善過日辰，點計轉會消息都未輪到佢。點知哥連泰斯自從簽入肥哨後，呢間巴甲球會人氣急升，球會主席仲話有信心游說到施丹加盟㖭！高比咁講：「簽施丹當然係發夢嘅事，但朗拿度重返巴西，唔係一樣好似發緊夢咩？要施丹復出係好難，但唔係冇可能囉！」高比好似胸有成竹，我求大俠就放長雙眼，睇吓施丹會唔會去到巴西咁遠踢波啦！
想當年「銀河艦隊」盛勢時，曾經有套自家製電影《皇馬傳奇》，好受歡迎；家陣好似拍續集咁，自然唔少得萬人迷碧咸。英國《太陽報》嗰邊放風，話假如佩雷斯「回朝」做皇馬新主席，今夏會動用1,000萬鎊（約1.07億港元），由AC米蘭手上攔途截劫碧咸。老實講，呢單嘢好明顯係碧咸俾佩雷斯擺上枱，為爭新主席而造勢啫！
之但係堂堂萬人迷，點會靠人哋先有份做《皇馬傳奇續集》主角？呢位AC球星周二趁老婆維多莉亞同幾個仔仲喺洛杉磯，自己就喺米蘭出席一個癌症研究會晚宴；以碧咸嘅魅力，梗係成晚俾啲女圍住啦！雖然冇證據話佢偷食，但應該難逃被老婆扭耳仔嘅下場。
魯爾有機重返國家隊
講到《皇馬傳奇》喇喎，當然要提吓唯一仲踢緊皇馬嘅隊長魯爾啦！呢位31歲傳奇人物今季復蘇，聯賽、西盃同歐聯加埋已入咗20球，終於守得雲開；西班牙國家隊教練迪保斯基話有意重召魯爾，應付嚟緊兩場對土耳其嘅世盃外。魯爾成兩年半未入選過大軍，今次當然上晒《馬卡報》頭條啦！6條A拆夥咁多年，家有幾條「煙屎」鹹魚翻生，再成頭條人物，計我求大俠話，呢套續集票房肯定收得！