港股連升5日後，升勢終於不繼，噚日午後恒指跟外圍搶上13226高位，再升250點，但跟住就掉頭急挫，且反升為跌，仲以全日低位收市，恒指跌98點，H指亦跌91點。
恒指由11345的低位，連升5日半，大升近1900點，亦剛好升到50日線（13155）水平，受阻而要回氣，好正常，現時20日線12479，10日線12181，正在上升中；恒指會調整幾百點，守得住，可以再起。
大市雖轉向，但上升正股仍有390多隻，內房重型股富力地產（2777）派成績表，萬人矚目，盈利倒退係意料中事，股價亦因而急挫，噚日最高見8.6元，午後插到落7.72元，跌勢只係轉瞬間，跟住又反彈，結果以8.15元收市，仍有2仙進賬。
其實，富力盤數已算唔錯，營業額153.6億元人民幣（此段同），升4%，盈利31.34億元，跌40.9%，每股盈利0.9727元，末期息0.28元，以昨日收市價計，往績PE7.4倍，息率3.8厘。去年錄得協議銷售額160億元，今年銷售目標220億元。樓市回暖，今年首兩個月銷售有5成至逾倍增長，發展商有番信心，內房業09年盈利亦有機會好轉。
股價已反映08年劣績
內房股價大幅回落，早已反映08年業績倒退的不利因素，樓市轉活之勢若能持續，勢必刺激「跌到殘」的股價出現急彈，特別係財況健全的中型內房股，更有機會升一兩個開，今日推介嘅係中渝置地（1224）。
中渝基地在四川，主力在重慶及成都等大城市，有土儲1200多萬平方米，在重慶就佔5成。重慶提振樓市最積極，今年以來，樓市銷情亦最活躍，曾試過一周成交逾7000宗，創下一年來的高紀錄。重慶樓市轉旺，中渝自然係最大受惠者。
睇中渝往績，08年（12月結）確係不堪提，中期盈利大倒退99%，全年更可能要蝕。但買股票，睇前景，現時中渝市值僅30億元，以土儲「晒士」係富力一半，樓市一好轉，一年賺6至7億或甚至逾10億元，唔係難事，股價亦好易升番一兩個開。中渝股價每一次調整，都係低吸機會。
中渝年多前歷史高價18元，現時1.37元，大平賣，即使升兩倍，上番4.0元，都只係高價兩折多而已。
郭兆誠