伍晃榮生前嗰種抵死幽默嘅報道新聞手法，留畀我哋好多美麗回憶，但最重要係顛覆咗傳統嘅報道新聞方式，連ESPN都有樣學樣，佢哋早排講波講到興起，順便攞埋容祖兒嚟開玩笑㖭！
馮仁昭日前喺網上搵到條歐聯16強次回合賽事車路士對祖雲達斯嘅短片，祖兒之前成日俾人笑個樣似車路士中場艾辛（MichaelEssien），ESPN主持郭子龍就食住條橋，一講到艾辛就借啲意串連祖兒啲歌嚟講，真係大整蠱！
網友勁讚
郭子龍介紹艾辛嗰陣時話：「艾辛養傷半年喺《跑步機上》苦練，就係等《隆重登場》做正印，有機會自然要《爭氣》。」之後報道場波，佢又照辦煮碗搬晒祖兒啲歌出嚟：「呢個組織絕對唔似唱《兒歌》㗎」、「好似《穿花蝴蝶》嘅艾辛衝前補中」、「基亞連尼要同杜奧巴《一拍兩散》」、「球證冇畀佢《告解》機會，要佢《紅牌出場》」，惡搞得嚟又有紋有路喎。見到網友反應咁熱烈，睇嚟新聞娛樂化係大勢所趨。
另外，祖兒日前幫運動品牌拍廣告，為展現動感一面，佢一路聽住音樂，一路擺動身軀，真係同艾辛一樣咁充滿活力。
惡搞祖兒網址
http://www.youtube.com/watch?v=H79Oa2z4bJA
