滙控（005）嘅世紀供股係咪去馬，明日揭盅。噚日，滙豐亞太區主席鄭海泉出席理財講座，同200個學生哥分享理財心得，順便講吓童年往事。
鄭大班駕到，學生哥自然唔放過問佢搵銀之道，有人問佢家存款利率咁低，會唔會建議同學拎儲蓄出嚟買股票，或者買滙控供股權？鄭大班話自己100%支持供股，但冇將大部份資產放喺股票，反而建議中學生儲起六成零用錢，買樓做業主，因為冇瓦遮頭個人會好唔穩陣。喺滙控股東議決供股前，鄭大班居然教人買樓好過買股，華華諗，咁算唔算倒米？
不過學生哥真係要喺股海中尋寶，鄭大班都唔阻人發達，仲送埋投資錦囊──「買股票要小心，一定要睇公司核心業務，千祈唔好博。」
其實鄭大班咁語重心長，係知道搵錢唔易，佢話細細個就因為想食雪條搞到要行路返屋企，明白要享受就要犧牲，領略到儲蓄嘅重要性。
穿膠花遇無良僱主
佢仲話試過做童工，穿膠花賺零用錢，點知遇到無良僱主，將穿好嘅膠花交畀老細之後，僱主竟然話少咗兩磅，唔畀錢之餘仲要佢賠錢收場。
講完錢，鄭大班話當年畢業後有幾個offer，最後揀咗入滙控，無非為咗攞100%買樓貸款。華華諗，最開心梗喺班地產商啦，不過滙豐早排高調推出定息按揭搶客，唔知佢係咪諗住搶攻埋學生市場呢？
李華華
mailto:[email protected]