金融海嘯下投資者損失慘重，獲政府注資嘅高盛有唔少員工一身蟻，當中投資高盛旗下精英基金嘅員工，亦慘被公司追收孖展，高盛為咗幫佢哋度過難關，決定「慷慨解囊」，向千多個員工提供貸款應急。
高盛發言人承認，上個禮拜已經發email畀員工，話公司會提供貸款畀佢哋應付內部基金補倉嘅要求，貸款額由數千至數十萬美元不等。《紐約時報》話，部份基金會喺4月追加資金，交唔到數嘅員工，好可能連飯碗都冇埋。
高盛擅自攞納稅人嘅錢，打救炒燶基金嘅員工，雖然唔啱，但比AIG將啲錢當做花紅派，高盛咁做點都叫做拯救有財政問題嘅人，手法高明好多。