立法會噚日首次就新世界中國（917）聘請梁展文事件舉行委員會聆訊，新中主席鄭家純將於下月中被傳召，到時社民連議員梁國雄（長毛）會提問。社民連議員出咗名多怪招，又可能掟生果，但純官講到明冇有怕，一於處之泰然。
自認小人物冇有怕
噚日，純官喺新世界業績記者會上開玩笑咁話：「佢當我係特首咁嘅大人物，先會掟蕉，我只係小人物！」其實驚都驚唔嚟，「立法會議員好惡、好大權力，要鬧邊個就鬧邊個，我都控制唔到，只可以平常心對待。」
純官好感慨咁話，事件發展到家，佢只係感到有啲無可奈何，估都估唔到。純官重申，新中跟足招聘同審批程序請人，如果政府發覺有漏洞，就應該修補佢；又話新世界唔會因為呢件事，以後就唔請前政府高官，請人主要都係用人唯才咁話。對於下月聆訊，唯一最好嘅應付方法，就係平常心。