早前Canon公佈推出SX200IS，機身有紅、藍及黑三種顏色選擇，當中尤其以紅色最受用家注目！不過現知香港行貨只有黑魂版返嚟，感覺真係有啲可惜；直至實物到手，碳黑機身感覺都算幾靚仔，再加上「輕量級」機身底下，鏡頭仍可提供有12倍光學變焦（28-336mm），既有廣角拍攝能力，遠攝亦相當強，在配合1,210萬像素及DIGIC4影像處理器，相片成像質素相當唔錯，尤其影人像時，真係條條頭髮都纖毫畢現！
自動場景偵測
SX200IS閃燈有個比較特別設計，進入拍攝模式後，閃燈會自動升起，而回到重播模式就會自動降低，本來看似正常，但奇怪在用家唔能夠手動更改，即使用手亦不能將閃燈合上，當然用家仍可設定是否使用閃燈拍攝。
拍攝功能中，還加入眨眼偵測，當發現被拍攝者眨眼，畫面就會出現警告圖示，提示用家唔好影住，除此之外，加埋自動場景偵測技術，會自動為用家挑選合適拍攝模式，如微距及人像模式等，整體上操作都有唔錯評價，易用同時又有良好相片質素。
查詢：Canon（31912333）