羅賓奴近期喺曼城踢得好沉，連領隊曉士都睇唔順眼，計劃將呢位巴西球星雪藏至季尾。不過羅賓奴擺明係「皇帝女唔憂嫁」，聽聞車路士對佢仍未死心，有意夏天出價收購，羅賓奴真係定過抬油。歌手「蘇康」有首《越吻越傷心》，我求大俠就覺得羅賓奴都應該有首《越雪越開心》囉！
傳曉士雪佢到季尾
睇嚟呢單嘢好明顯係羅賓奴玩嘢，上年佢以3,250萬鎊（約3.5億港元）破全英轉會費紀錄由皇家馬德里加盟，全世界睇佢做戲。但係曼城家陣排喺英超第10，尤其羅賓奴作客時更係踢到冇影，隊波15場客績贏過一場咁大把。羅賓奴暫時喺聯賽加歐協盃都係入咗12球，對比佢嘅轉會費，逐球計每球要成270萬鎊，即約港幣3,000萬一球！
曉士話睇見羅賓奴個懶懶閒嘅衰樣，踢波又冇heart，諗住趁馬田柏杜夫養傷5個月後復出打番左翼，打算雪藏羅賓奴。其實我求大俠都好明白羅賓奴嘅心態嘅，對領隊信心又唔夠，卡卡又過檔不成，隊友又好多都未夠班，好難同佢拍住上，踢到冇心機好正常。羅賓奴自從去年12月28日聯賽作客布力般流浪入過波之後，足足近3個月未發過市，就知條巴西仔越踢越沉。
車路士咬住唔放
之但係曉士你有你雪，羅賓奴就佢有佢開心，話晒以佢嘅質素，真係唔憂冇大球會向佢招手，羅賓奴頂多「印印腳」坐冷板至季尾，但人工就照，真疏乎！
聽講車路士自前帥史高拉利簽唔到羅賓奴之後，近期又對呢位25歲球星感到興趣，話會用一個月時間留意吓佢嘅表現，先考慮夏天會唔會出價。如果羅賓奴仲有機會落場「騷哥利」，其實只要佢稍為落力啲踢，表現一定唔止近期咁。為前途又好，為曼城又好，我求大俠都希望再見到一個有鬥心嘅羅賓奴！