鬍鬚曾新一份預算案劣評如潮，唔少政黨扭計唔肯輕易支持，手握四票嘅工聯會未表態，鬍鬚曾今個星期日就主動出擊，遠赴慈雲山出席工聯會理事長黃國健嘅首個地區議員辦事處開幕禮，畀足面呢位工聯會頭頭。
白鴿黨早前同鬍鬚曾摸咖啡杯底講數，黃國健卻話財爺至今未聯絡佢，佢話如果議辦開幕當日有時間，唔介意即場同鬍鬚曾交換意見，工聯會要求預算案酌量加碼紓解民困，工聯會四票值幾多籌碼，鬍鬚曾要自行計數。
鬍鬚曾近嚟民望好似食瀉藥咁一瀉不止，連其他司局長都受連累，顯示市民不滿救市力度不足，鬍鬚曾唔志在自己民望，都可能要考慮吓其他高官感受喎。