旅遊界議員謝偉俊去到邊都咁惹火，旅遊業議會早前邀請佢列席會議做觀察員，不過佢卻劈炮唔撈，因為議會最近要求三名觀察員簽保密承諾書，更要求大家君子協定，觀察員只係議會「夥伴」，唔係去監察議會。
謝超人向八方證實，已回覆議會唔會簽署保密協議，因為簽咗無疑自廢武功，「唔通明知議會有嘢唔啱，都唔准講？唔可以監察議會，去開會做乜？」議會觀察員仲包括旅遊事務署代表，謝超人話連官員都不能監察議會運作，令人質疑做法，以前亦冇呢個規矩，新制度似乎係衝住佢而嚟。
唔保密唔准列席
議會總幹事董耀中話，議會成員都要簽類似保密承諾書，觀察員簽埋只係同大家睇齊，佢坦言若有人唔承諾保密，就好難邀請佢列席會議。旅遊事務署話除咗任觀察員外，官方有其他渠道監察議會運作。
埋唔到旅遊界堆，謝超人噚日卻現身鄉議局，原來佢係元朗十八鄉原居民，所以獲邀做鄉議局顧問，佢賣口乖感謝鄉紳畀機會佢為鄉民略出綿力，又話好慚愧唔識客家話，否則大家真正同聲同氣，傾乜都易話為啦。