西九文化區管理局董事局噚日舉行第四次會議，呢個局係「獨立王國」，所以一般人都唔清楚搞乜，噚日會議搞搞新意思，首次將會議作網上廣播，公開畀市民旁聽，八方同好多記者，噚日3點鐘上網收聽，點知聽咗3分鐘，網上廣播就突然終止。
大家初時以為係技術問題，會後向民政局查詢，先知原來個會真係只公開三分鐘，其他都係機密議程，要閂埋門傾。而所謂公開會議，亦冇乜實質內容，成員只係過目一份「西九文化區核心文化藝術設施市場分析顧問研究」嘅文件，內容係有關聘請顧問進行呢個研究，基本上冇討論就通過，民政局就話公開會議係好開始。呢3分鐘咁矜貴，大家唔想錯過，可網上重溫， http://www.wkcdauthority.hk/tc/meeting/Webcasting.htm。