財經局局長陳家強可能真係儍強上身，佢啱啱由澳洲返港，噚日出席一個公開午宴，講到金融海嘯冲擊時，同其他高官唱反調，指香港家經濟唔差，香港仍然有好強競爭力，「起碼冇搞到自己內傷先啦，好多地區都內傷，我哋冇內傷，呢個係好事。」
近排股市如坐過山車，儍強話股民情緒好容易波動，「由貪婪到恐懼係一線之間嘅事，市場嘅波動，係貪婪同恐懼構成。」會上有人問金融海嘯第二波嚟到未，仲有冇第三、第四波，陳家強就話，每個人對所謂第一、二、三波有不同定義，「其實我哋都唔知有幾多個波！」講到政府考慮港元發債時，儍強又口窒窒講錯咗準備發人民幣債券，連佢自己都知道發台瘟好厲害，拋出一句「我講緊乜呀？」