被謔稱「周一鑊」嘅食物及衞生局局長周一嶽，一年內向公眾三次道歉，冠絕政府高層，佢接受最新一期中大《大學線》訪問時話，如果連自己都認為做錯，就應該企出嚟道歉，坦誠比個人名譽更重要。雖然工作壓力大，不過佢未試過失眠。
訪問中周一嶽又透露自細就勁曳，俾阿爸打，俾老師罰企都教而不善，直到中學先收手，因為嗰時佢迷上運動，讀皇仁時係香港羽毛球青年隊員，攞過學界冠軍，入大學選擇讀醫，都係要爭取時間運動，因為醫科讀五年，可以有更多時間留喺校園玩多陣。
畢業後佢申請留學，大多數人去英國，佢好冷門揀去德國同瑞士，因為想學非傳統醫療方法，「做任何事都不一定要完全聽從上司、跟隨書本，但一定要思考這是否最好方法。」