噚日英國保誠香港分行CEO卓駿佳（JeffWalker）同財記食晏，單睇飯局地點喺五星級酒店中菜廳，就知佢哋財力雄厚，連獎賞最賺錢嗰班agent嘅開支都冇cut，復活節Jeff會帶450個達標保險代理，去賭城拉斯維加斯嘆吓咁話。
保誠香港舊年新做業務增13%，市佔率升至12%，成為本港保險二哥，爬咗前一哥友邦保險（AIA）頭，同現任一哥恒生（011）相距不遠。Jeff話唔會預測幾時攀上一哥地位，但堅信呢日總會來臨，為咗推高生意額，今年逆市招聘2000人，至年底時agent將達6000人。
至於會否收購AIA，Jeff堅決咁話唔會評論個別公司，又話收購唔係講時機同價格，最重要係能夠提高市佔率……仲話今年本港壽險市場會出現整合。唔知保誠香港係咪會去整合其他壽險公司做一哥呢？