新界王發叔獲煲呔欽點，一登行會盡顯身價，城中大孖沙好識做，即刻奉上大利是。鄉議局副主席張學明噚日透露，郭家嘅新鴻基地產捐出「五球」，即係500萬元畀鄉議局，資助位於沙田鄉議局新大樓興建經費，更一早開定支票，歡迎隨時攞錢。
新地低調捐款
據講鄉議局為表謝意，本來想喺今個月底，慶祝發叔晉身行會個千人盆菜宴上舉行捐款儀式，不過新地婉拒，話唔想太高調喎。500萬元對八方嚟講梗係唔嘢少啦，但對大孖沙卻濕濕碎過碎銀，唔夠買半個天璽單位，未夠畀倚巒睇樓按金，難怪唔使咁高調。
入行會後，發叔求籤運平平，不過財運似乎大吉，除咗新地咁闊佬，恒基四叔早前亦捐出500萬元畀鄉議局，而蓬瀛仙館同圓玄學院都決定加碼，分別捐多100萬元資助鄉議局起新大樓，等大樓唔好因為金融海嘯資金唔到位而爛尾。
發叔女婿入局
鄉議局新大樓工程費預算1.3億元，近一、兩年發叔四出撲水開工，獲鄉紳父老支持，連埋自己貼錢幾百萬元，近日終於望到家鄉，尚欠70至80萬元左右。新界人「財」濟濟，相信要籌夠數唔係太困難，何況發叔家係特區政治權力核心新貴、煲呔身邊紅人，籌款更加易辦事。行會成員有嚴格利益申報制度，鄉議局接受地產商捐獻卻不受監管，呢個疑似利益輸送灰色地帶，睇真啲，灰過灰諧。
鄉議局近年鼓吹引進專業人士意見，噚日通過委任離島區委任議員、測量師余漢坤做顧問。余漢坤仲有第三重身份，就係發叔女婿，係繼發叔大仔劉業強獲引薦進入鄉議局學嘢兼幫手外，另一個成功入局嘅「皇」親國戚。
開會一家親係原居民辦事特色，鄉紳對於世姪當然照顧有加，至於能否發圍，還看各人修為。鄉議局噚日新成立一個「珠三角研究小組」，探討新界發展與珠三角如何合作，鄉紳講到明呢個係省招牌大project，交由劉業強領導嘅專業委員會負責，八方相信發叔都對乖仔寄予厚望，希望做得好好睇睇，先至放心交棒。
mailto:[email protected]