《就這樣》係啤梨改編新歌《寧願這樣》嘅原唱歌，啤梨想藉住呢首歌，話畀大家知，會以更成熟更情深歌聲重新投入樂壇。不過，講到車，呢個溫柔深情大男孩卻偏愛硬邦邦粗線條嘅H家族第三代，懶理同柔情形象背道而馳，打從心底愛上H3，原因好直接簡單：靚！
記者：梁美甜
攝影：林栢鈞
外表最重要
《寧願這樣》一如大部份情歌般描寫情愛、失戀之類，但，有別於昔日Hit爆嘅《IBelieve》，啤梨把聲同感覺都唔同咗，「係，以前年紀同聲線都比較嫩，未掌握到點去演繹一首歌，家就開始學曉運用聲線同情感去表達。」說時聲線一貫溫婉，如此柔情男孩會情傾身形巨大兼線條硬朗、一身軍車Look嘅HummerH3，着實叫人有點意外。
「好靚！」靚？「真係好靚！」一口氣講幾次，好，我信！咁靚喺邊呢？「黑色車身加入大量電鍍，好HipHop，之前喺澳洲見過好多次，已經覺得好靚！」差點忘記，啤梨偏好黑色，一身亮黑外形方正硬淨嘅H3配上電鍍裝飾，的確有點HipHop及Fancy感，「好多人揀車會着重性能馬力，我唔係，外形反而佔九成，好想擁有佢。」見到啤梨揸住部Crossroad前來，都已經估到一兩成。
揸車練歌
曾經揸過跑款TT嘅啤梨直言，後排坐唔到人所以就換咗部車，即是話好在乎乘客感受喇，「我唔自私o架，我好重視坐車嘅朋友同屋企人感受。」不過H3沿自軍用車設計，四驅系統大大有別於實用舒適嘅家庭車喎！「唔係吖，中控設計按鈕好簡單實用。」甫上駕駛座嘅啤梨即時東摸摸西摷摷。「呢度好麻甩喎！」吓？原來係指中控下方兩個電插位，好多人都作點煙用，「將面板按鈕改埋電鍍就更HipHop更靚！」咪只係睇個Look啦，鍊番轉再講。
跑完一圈，即時有更深入了解。「原來揸同坐嘅感覺分別幾大，窗細細有啲侷促，好彩有個天窗令壓迫感大減，頭腳空間又夠，都算坐得舒服。比想像中易操控，起步時慢少少，行順之後反應又敏捷番，個避震較硬……」「咦，音響系統得唔得呢？」DJ本能反應，豪華版H3配備7喇叭PremiumMonsoonSoundSystem，水準梗有番咁上下。「唔怪得連中、高音都清楚聽到！啱晒我聽歌練歌。」話晒嚟緊會以唱作歌手形象出新碟，要勤力啲練習。佢身邊助手更笑言：「價錢唔錯至真，話唔定唔再係DreamCar而係座駕。」
Profile
引擎：3,653cc直五
馬力：244ps/5,600rpm
扭力：33.5kgm/4,600rpm
傳動：四前速自動波，四驅
售價：$698,000
查詢：HummerHK（69031323）