鱷魚條牙罅，電梯條門罅，祠堂條牆罅。今年春節孟公屋唐狗女「黑妹」被困兩幢祠堂之間的牆罅，村民拒絕破牆救狗，觸發一場城鄉文化衝突。當日向傳媒求助的孟公屋居民亮哥，對黑妹失救感到無奈，但也同情村長的處境，「講句公道話，易地而處，你會點做？」
從事運輸的亮哥，在孟公屋已住了20年，對這裏民情的了解，不比原居民少。他與黑妹相當熟絡，每晚放工回到村口，黑妹一見到他的客貨車，就會走來擺尾。年廿九傍晚，他得知黑妹被困，消防與愛護動物協會想盡辦法也救不到黑妹，亮哥決定求助傳媒，希望全港發揮小宇宙，找到方法。
村民態度迥異
「冇諗過黑妹會引起咁大迴響，我當時只係一心諗住想辦法救到黑妹出嚟，發夢都諗唔到，連電視台都嚟埋。」亮哥說，一些村民對黑妹很冷漠，當日消防前來搶救黑妹，有位年老村民竟然坐在消防梯上，阻撓消防。但又有些村民很熱心，「黑妹被困之後，一早已經有好多村民打電話去愛護動物協會求助。好多人話村民漠不關心，係唔啱嘅。」
消防曾向村長提議拆牆，遭到拒絕。愛狗人士其後群起攻擊村長，本身養了兩隻狗的亮哥這樣說：「講句公道話，易地而處，你係村長會點做？嗰度有兩間祠堂，拆邊間？我係村長都唔會咁武斷。村內好多鬥爭，如果村長妄下決定，以後成條村有乜郁，就會賴你。」
被罵小題大做
亮哥向報館求助，引發社會關注，也因此承受了不少壓力，「有村民覺得我小題大做，搞到黑妹被困變咗政治事件，搞到村長不停收到電話，記者、鄉紳，連發叔（鄉議局主席劉皇發）都搵佢，好大壓力。好彩我一向同村民相處融洽，唔係一早被人趕走咗。」
「香港算係有愛心嘅社會，香港嘅狗都算係矜貴，為咗搶救黑妹，動用咗好多人力物力。黑妹死咗之後，仲有好多人嚟探佢媽咪大黑妹。」亮哥說：「黑妹死咗，村民對待其他狗都好咗，以前成日有人搵石頭掟啲狗，嫌佢哋嘈。」困死黑妹的祠堂牆罅，現已用磚頭瓦片堵住。至於都市文明與傳統信仰之間的罅縫，則不知何時方能修補。
記者蔡元貴